Ryngkat ki khynnah skul, mih Ka Sur ki Nong West sha surok ba sngewkhia ïa ka jingjyllei Drok

Nongstoiñ, Jymmang 17: Ha ryngkat bad ki khynnah skul kiba don ha Nongstoiñ, ki nongïalam jong ka Ka Sur ki Nong West, ki la mih paidbah hynne ka sngi ban pynpaw ka jingsngewkhia bad ka jingpynrem, namar ka imlang sahlang mynta ka la nang hiar namar ki kam thom bor, khamtam ka jingjyllei jong ki die bad nongdih drok ha ka dong ka thaiñ.
Ka jingïaid paidbah lane rally ka la sdang najan Indoor Stadium bad nangne ka la don ka jingïaid paidbah sha khmat iew Nongstoiñ, ha ryngkat ki jingpyrta jong ki khynnah skul ba dei ban ïakhun tyngeh ïa u Drok bad ïa wer ruh ïa baroh ban ong Em ïa ka jingdie bad dih drok.
Hakhmat iew Nongstoiñ, la pynlong ïa ka jingïalang paidbah ha kaba ki nongïalam jong ka Sur ki Nong West, ki la pynpaw ïa ki kyntien kiba sngewkhia halor ka jingjyllei ki jingsniew, ki kam thom bor bad khamtam ka jingnang roi kiba die bad kiba dih drok.
Na ka liang u Bah D.Sun u ba long ruh u shongknor jong ka jingïalang u la ong, “Ka jingpynlong jong ngi ïa kane ka rally ka long ban kyrsiew thiah noh ïa ngi ki paidbah, ba ngim dei ban shu sngap mynthi da kaba shu shong ha ïing khlem da mih sha surok ban hylla paidbah, kum ka jingbeh krad ïa kine ki nongleh kam sniew kiba la jyllei ha kane ka thaiñ jong ngi”.
U la ong ruh, “Ka jingjyllei jong u Drok ha kine ki snem ka la nang shyrkhei ha Nongstoiñ bad haba ngi leit shabar kiba bun ki ong ba la nang jyllei ki nongdih drok. Ngi sngew leh raiñ halor kane bad dei na kane ka daw ba ngi sa pynlong ïa kane ka rally. Ngi kyrmen ruh ba lyngba kane ka Sur jong ki paidbah, ki khynnah skul bad ki nonghikai ngin lah ban ïakhun pyrshah ïa u Drok”.
Na ka liang u Hamar Lyngkhoi u la ong, “Ka jingdon jong kine ki nongdih Drok ka long ka jingsyier ïa ki riew lui lui kiba don ha iew lane shabar ka Nongstoiñ. Kine ki jait briew kiba la ngop ha u drok, kim tip shuh ban pyrkhat ïa ki rangbah ne riew kynthei, hynrei ki nud ban thom bor bad lute im im peit peit ïa ki”, bad bynrap ba ka Sur ki Nong West ka maham lypa ruh ïa ki nongdie bad nongdih drok.
U la kynthoh ruh ïa ka Ophis jong u Syiem Nongstoiñ ba ka iew jong ka Nongstoiñ ka long kaba khlem jingkhang satia, dei na ka ta ka daw ki dakaid ruh ki don bun hapoh jong ka. “Ko u Syiem, ki Lyngdoh bad ki Myntri jong ka ophis Hima sngewbha ban da buh ki jingkhang na ka bynta kane ka iew Nongstoiñ, ym ban shu ieh rynghang kumto ba ki nongdih drok kin long ki nong thombor ïa ki nongshong iew shong hat kumba la jia dang shen”.
“Nga kyntu sha baroh ki nongïalam sengbhalang, ki nongshong iew, ki longkmie longkpa bad ki VDP jong ki shnong ki thaw ban ïatreilang, khnang ba ka iew jong ngi, ki shnong jong ngi ki long kiba khuid bad ki ban ym wanrah shuh ïa ki jingjia kiba pynsmiej ïa ka imlang sahlang”, ong u Bah Hamar.
Na ka liang u Bah Will Sohshang u la ong, “Ki jingdih pynbuaid naduh ka kyiad ruh ki wanrah ïa ka jingsniew kiba kharoi ha kane ka imlang sahlang jong ngi. Hynrei mynta lei lei haba la wan sa u ne u drok lei lei, ngi ïohi ba ki jingsniew ki la nang kham jyllei. Baroh ki jingjia kiba ngi la sakhi ha kine ki khyndiat ba la leit noh, na kawei ka jaka sha kawei ka jaka, kine ki briew kiba pyndonkam ïa ki jingdih pynbuaid ki la leh ki kam sniew kiba la shyrkhei”.
“Lehse kine kiei kiei kiba la mih ha kine ki sngi ki dei kiba mih ruh na ka daw jong ki rympei ïing jong ngi. Katba ka pyrthei ka nang kylla ha ka juk ka jingshai bad jingstad, ki don pat ruh ki briew kiba la nang lamwir pynban, kiba long ka jingsniew dur ïa ka ïing ka sem bad ka imlang sahlang. Bun na ki kmie ki kpa bad ki khun kim ju ïa don por shuh ha ka sneng ka kraw kum ha ki por mynshwa”.
“Ha kane ka juk jong ngi mynta la ñiar ban shem ïa kiba kum kita, balei namar ha ka jingbunkam ki kmie ki kpa bad teng teng ym ju ïakynduh ym ju ïohi ruh. Lada ka long kumta hato shaei keiñ kata ka bha ka miat, ka sneng ka kraw bad shaei kan poi ka imlang sahlang”.
Na ka liang u Wanteibok Lyngdoh u la ong, “Ka jaidbynriew ka dei ka jaidbynriew tip briew tip hynrei kaba sngewsih ka long mynta ka la hiar dor. Ha ki por mynshwa lada ïohi ïa ki khynnah ha shnong, ki rangbah don bad ki sneng ïa kiba dih duma kumta ka jingsniew ka duna. Hynrei mynta ka lah long khongpong haba lada phi sneng haba phi ïohi ïa uno uno u khynnah, ki ong kylla me ai me ne ?. Katba ki kmie ki kpa lada phi pyntip ïa ki khun jong ki, ki ong kylla balei phi wan batai ïa ki khun jong nga. Kane ka dei ka daw jong ka jingkynrei ki kam sniew ba ngi kloi palat ban ïashah khun bad klet ïa ka jingsniew”.
U la ong ruh, “Ka Jylla Meghalaya ka lah donkam ban pyntreikam ïa ka Drug Policy hapoh ka jylla, khnang ban teh lakam ïa ka jingkylli ka jingdie drug bad dih drug hapoh ka thaiñ bad hapoh ka jylla. Kumba long mynta ka jylla Meghalaya ka pyndonkam tang da ka sin jong ka sorkar pdeng ha kaba ïa dei bad u drug ïa kaba lah tip kum ka Narcotic Drugs and Spchotropic Substancs Act 1985 (NDPS Act). Namar kata ka aiñ kaba khlaiñ ka dei kaba kongsan tam ban ïakhun ïa u drok, lym kumta ka eh than ban ïakhun”.
Katba na ka liang jong u Moslander Marngar u la ong, “Ka por mynta ka ka dei ka por ban pyrkhat bad ngim dei ban sngew ba ki khun jong nga ki biang, jong kiwei wat dep shato tangba ban lait ïalade bad ngi klet ban ïa sneng lem ïa kiwei. Haba ngi im ha ka imlang sahlang, phim lah ban kiar lada ka imlang ka sniew. Nga shu ong ba ym slem kan wan lap ïa ki khun jong phi. Kumta ka lah dei ban ban khie ban ïarap lem ïa u para marjan”.
U la ong ruh, “Ka jingkylli ha ka kam die drok bad dih drok hapoh ka thaiñ, ka dei ba na ka liang ka hima kam shimkhia ban peit ïa ka iew. Ka jingkylli ngi hap ban kylli ruh na ka Hima, hato balei kam peit ne phi ailad kine kiba die drok dih drok, kin long ki nonglute ïa ngi bad ka jingma ïa ngi, haba wat ki ki kmie ki khynnah ki tieng ban rung ha iew ha kine ki por ba kyllei palat ka kam sniew”.