Mawkyrwat, Jymmang 17: Ka Maharam Government Higher Secondary School, Mawkyrwat mynta ka sngi ka 17 tarik u Jymmang, 2022 ka la pynlong ka jingïa-ïaid paidbah kaba la sdang phyllaw jong ka skul bad kane ka long kum shibynta ban ïasnohktilang ha ka ‘Meghalaya World No Tobacco Day 2022’ ba la pynbeit da ka National Health Mission halor ka phang, “Tobacco vs Environment”.
Kane ka jingïa-ïaid paidbah ne rally la pynlong khnang ban pynsngewthuh ïa ki paidbah nongshong shnong ïa ki jingma jong ka jingdih duma kiba ktah ïa ka koit ka khiah ïa ki nongdih duma, nangta ka jingpynjulor jong ki jaboh kiba mih na u duma ïa ka mei mariang bad ktah ïa ka jingsboh ka khyndew, ïa ki jingthung jingtep, ïa ka suiñbneng, ïa ka jingkhuid ka lyer, ka um bad kiwei kiwei ki jingktah.
La pynlong ïa ka jingïaid paidbah da kaba sdang na phyllaw ïing skul bad ïaid lyngba shaduh lad CHC Mawkyrwat, rung sha ïew Mawkyrwat bad poi biang sha skul. Ha kane ka sngi ka la don ruh ki jingthoh slogan, ki pledge, ki signature campaign ba la ïashimbynta da ki khynnah skul bad ki paidbah halor katei ka phang.
Ha katei ka jingïa-ïaid paidbah la ïashimbynta shitrhem naduh ki khynnah skul bad kumjuh ha ryngkat ki nonghikai jong ka Maharam Government Higher Secondary School, Mawkyrwat.
