Kumba long mynta ki paid nongshong shnong jong ka jylla ki dap hapdeng ka jinglynga bad pisa jingmut namar ba la kynrum kynram ka saiñ pyrthei hapoh ka jylla hadien ka jingphet noh jong ki 12 ngut ki MLA ka Congress bad pynïasoh ïalade sha ka All India Trinamool Congress (AITC ne kata ka TMC kaba ïatip baroh shi katta). Ha ki snem kiba la leit noh ka jingïakhun ka long hapdeng ki seng riewlum bad ka Congress bad hadien kane sa wan ka BJP bad ka NPP. Hynrei mynta haba la wan rung sha ka TMC ki paidbah ki la kulmar jingmut tang ïano shuh ban jied ne kyrshan. Ym tang katta sa ka AAP ruh ka la pynkhreh bha mynta ban wan iuhkjat ha ka jylla shwa ka election MLA 2023.
Ha ka jingshisha kane ka la dei ka kabu bah ïa ki seng riewlum lada ki kloi ban ïa tylli. Namar dei ha kum kane ka khep ba la bun palat ki seng kiba na bar lada ïa tylli ki seng riewlum kin poi sha ka thong ne kin ïoh bat beit ïa ka jingsynshar ha u 2023. Hynrei kaba eh pat ïa ki seng riewlum ka dei namar ba jur palat ka jingïakwah long nongïalam.
Lada phai nuksa sha ri lum Garo ym lah ban len ki paidbah ne ki MLA ki phai beit tang sha ki arngut ki nongïalam kata la ka dei ïa u Dr Mukul Sangma ne ïa u Conrad K.Sangma. Hynrei hangne ha ri lum Khasi bad Jaintia te ym lah ban long kumta namar baroh baroh ki kwah long nongïalam bad dei kane kaba buh ïa ka jingeh hakhmat ïa ki seng riewlum ban poi sha ka thong ban ïa tylli. Lada phai naduh mynshwa haduh mynta ruh ka daw bah ïa ki seng riewlum kiba khlaiñ hangne ha ri lum Khasi bad Jaintia ka dei beit tang na ka daw ka jingïaknieh long nongïalam bad poi sha ka jingïapait ïapra.
Hooid ka long kaba sngewdei ba kiba bun ki riew saiñ pyrthei ki pynpaw ba haba la don bun kita ki National Party khlem pep ka kabu kan long ïa ki seng riewlum tangba u dak jingkylli u long hato ki kloi ne em ban ïa tylli?. Namar lada ïaleh la ka jong ka jong ka party kan long biang kumjuh hi kin don ki constituency kiba tang namar ba ïeng ar lane lai ngut ki kyrteng seng riewlum ba sa poi sha u pud ban rem ki kyrtong jong ki seng riewlum bad jop suk ki National Party.
Hooid ka Congress wat la ka la pait na ka jingphet ki 12 ngut kam mut ba ka party kan tlot ha baroh ki constituency kin don ki jaka ïoh ka khlaiñ pynban. Kumjuh ruh ka NPP kaba bat ïa ka jingsynshar ruh ka don ka jingkhmih lynti ba ki paidbah kin phai sha ki kam ba ka trei bad kin dang pynjop bun ïa ka. Wat ka BJP ruh ka don ka juh ka jingkyrmen hi. Tangba ym lah ruh ban kheiñ sting ïa ka TMC namar wat la ka dei ka party kaba dang thymmai ha ka jylla namar ba la seng nongrim pat ïa ka da ki MLA khamtam hapoh ka jingïalam u Dr Mukul Sangma khlem pep kane ka party ruh kan ïa ai reng hi khamtam ha ri lum Garo .
Kumba long mynta ki paidbah ki dang bishar bniah bha ïa ka jinglong jingman ka saiñ pyrthei ha ka jylla bad ka rai ba kin ai kan long beit haba kut u 2022 ne sdang u 2023. Namar dei ha kum katei ka por lah ban ong ba ka lyer jong ka election kan sa sdang ban beh ha kane ka jylla bad yn sa sngewthuh ruh ka jingïakhun kan long hapdeng jongno la ka long para National Party ne la ka long para Seng Riewlum.
