Shillong, Jymmang 17: Kum shi bynta ban nang kyntiew shuh shuh ïa ka football hapoh ka jylla, ka Meghalaya Football Association (MFA) kan sa pynlong da ka lympung ïalehkai kaba la tip kum ka Amateur Football League kaban sdang naduh ka 11 tarik Jylliew 2022.
Haba pynbna ïa kane ha ka sngi Ba-ar ha Shillong Press Club u Bah Wanshan Kharkrang treasurer bad u Bah Arki Nongrum nongai buit ka MFA, ki la ïathuh ba ka jingthmu ban pynlong ïa kane ka league ka long ban nang kyntiew ha kajuh ka por ban ïoh ïa ka met ka phad kaba koit ba khiah bad ba khlaiñ.
Ïa kane ka lympung kaba nyngkong eh yn pynlong ha nongbah Shillong bad kin don 20 tylli ki team kiban sa ïakhun ha ki 10 bnai. “Ïa mynta namar ka dang dei ka sien kaba nyngkong ngin pynlong tang ha nongbah Shillong bad ngi la ïapyrkhat ban rah pat sa sha kiwei pat ki bynta jong ka jylla ha ki snem kiban wan,” ong u Bah Wanshan.
“Kane ka league kan dei beit tang na bynta kito ki nongïalehkai ki bym pat ïalehkai lane kibym pat pynrung kyrteng ïalade ha ki league bapher bapher ba la ithuh da ka MFA bad yn pynïalehkai ruh tang ha kaba kut taïew bad ha ki sngi shuti. Kane ka long ka jingplie lad na bynta kito kiba don shisha ka jingsngewtynnad bad kiba don ka mynsiem bad kiba ym kot bor ban ïalehkai ha ki club,” ong u Bah Arki Nongrum.
“Bunsien hi ngi shem ba ka jingthmu ban pynmih player football dei beit tang na kiba ïalehkai na ki club hynrei klet noh pat ïa kiba don shisha ka mynsiem bad kiba don ka sap ïalehkai. Kumta lyngba kane kan ai mynsiem ïa kito ki bym kot ka thong ban ïalehkai ha ki club bad ruh ka jingkmen na bynta ki paidbah nongpeitkai.”
U la ïathuh ruh ba ka MFA kan sa pynlong ruh ïa ka Veteran League kaban dei beit tang na bynta kito kiba 45 snem sha jrong hynrei ha kane ka Amateur League kan dei na bynta kiba 20 snem shaneng.
Shuh shuh u la ïathuh ba ha kane ka league yn pynkhing bha na bynta kito ki player kiba la dep ban pynrung kyrteng ïalade bad kiba mih madan ha ki league bapher bapher.
“Ka MFA Amateur League kadei sa kawei pat ka sienjam jong ka MFA ban kyntiew ïa ka football hapoh ka jylla. Ka Amateur League ka dei ka bynta bad ka rynsan kaba naduh na trai ha kylleng ki ri ka pyrthei bad ailad ïa kito kiba khlem poi sha ka thong ban ïalehkai ha ki club,” ong u Bah Larsing Ming Sawian President ka MFA.
U la ong ruh, “Ka MFA ka la trei shitom ban pynlong ïa kane ka lympung kaban long ha ki 10 bnai bad ngi dap da ka jingsngew sarong ban plie mynta u 2022. Ngi ngeit skhem ba kane ka League kan ïoh jaka ha ka almanak jong ka football hapoh ka jyla bad nga kyrkhu kyrdoh ïa baroh ki team bad ki player ba kin ïalehkai bha.”
