Jowai, Jymmang 17: Ka lympung ïalehkai phutbol ba la tip kum ka ‘2nd U Adelbert Laloo Memorial Trophy’ jong ka kyrdan 3rd Division Football Tournament 2022 ba la pynïaid da ka West Jaiñtia District Sports Association (WJDSA) kala jam noh sha ka Semi Final jong kane ka lympung ka ban long ha ka 20 bad 21 tarik mynta u bnai ha madan Kiang Nangbha Stadium Jowai.
Haba phai sha ka jingïakhun ba khadduh mynta ka sngi jong ka Quarter Final hapdeng ka Shangpung khliehmuchut pyrshah ïa ka Risingsun Mukhla, haduh ba kut jong ka por ïakhun (normal time) kila ïakhait khlem da don kiba thep kol da 0-0. Kumta la hap ban pynïakhun da ka jingïashut Tie Breaker ha kaba ka Shangpung khliehmuchut kala jop da 5-3 kol.
Ka jingïakhun ‘Semi Final’ ha ka 20 tarik u Jymmang ha ka por 3 baje nohphai sngi ka kynhun ïalehkai jong ka Maitchaphrang Mootyrchiah kan ïakhun pyrshah ïa ka Madankynsaw Mookyndeng. Katba ha ka 21 tarik u Jymmang ka Khliehmuchut Shangpung kan ïakhun pyrshah ïa ka Mookyrdup.
