Dawa ka HANM ban kem bad tohkit ïa kiba donkti halor ka jinglait tuh ki jingkylli ka NEET

Shillong Jymmang 16: U Bah Onistar Nongkynrih, President ka Hynñiewtrep Achik National Movement (HANM), East Khasi Hills District, u la pynpaw ïa ka jingsngewkhia kaba jur halor ka jingmih paidbah jong ka jingkynnoh ba la leak ïa ka question paper jong ka NEET Examination ha ki snem 2015, 2016, 2021, 2024 bad mynta ruh ha u snem 2026 hapoh ka ri India baroh kawei.
U la ong ba kane ka jingjia ka la wanrah ka jingsngew paidbah bad ka jingbymhok ïa ki lak ngut ki samla pule kiba trei shitom bad kiba don ka jingangnud ban long doctor lyngba ka jingtrei hok bad jingïakhun paidbah. Ka jingïaleh exam ka dei ban long kaba khuid bad kaba shai hynrei kine ki jingjia ki pynjah burom ïa ka jylla bad ïa ka ri hi baroh kawei.
Na ka liang ka HANM East Khasi Hills District, ka dawa jur ba dei ban tohkit paidbah bad kem noh mardor ïa baroh kiba donkti ha kane ka kam, kynthup ïa u Dinesh Biwal bad kino kino kiba don bynta ha kane ka jingthok exam. Ym lah ban ailad ba ka lawei jong ki samla pule kan shah pynjulor namar ka jingïabamsap bad ka jingbym kitkhlieh jong ki bor ba dei peit.
“Nga pynpaw ruh ka jingsngewlem ïa baroh ki khynnah kiba la thoh ïa ka exam ha ka 3 tarik u Jymmang bad kiba hap ban pynkhreh biang na ka bynta ka re-examination. Ngi kyntu ïa ki ba kin long kiba skhem mynsiem bad ban nang ïai trei shitom namar ka jingjop ka dang ap ïa ki,” ong u nongïalam ka HANM.
U la ong ba ka jylla Meghalaya ka dang donkam shibun ki doctor, khamtam hapoh ki CHC, PHC bad ki hospital ha ki thaiñ nongkyndong kiba dang duna bha ki doctor bad ki nongtrei sumar. Kumta ka long kaba donkam eh ba ki samla ka jylla, khamtam ki samla Khasi bad ki samla na Meghalaya, kin ïoh ka lad kaba hok ban leh bha ha ka exam bad ban shakri ïa ka jylla lashai la shisngi.
“Nga pynpaw ruh ba kumba la leh da ka jylla Tamil Nadu halor ka bynta jong ka NEET issue, ka jylla jong ngi ruh ka dei ban peitngor bha halor kane ka bynta ban ïada ïa ka hok jong ki samla pule. Na ka liang ka HANM East Khasi Hills District, ngi kyrmen skhem ba ki samla pule jong ka Meghalaya kin leh bha ha ka re-exam bad kin poi sha ka thong jong ki lyngba ka jingtrei shitom, ka jingïaineh bad ka jingïaid lynti kaba hok,” ong nongïalam ka seng.