Ryngkat ki khynnah ki klob ka ri France yn ïa tynjuh bor ka Myngken Christian HSS ha Paris

Shillong, Lber 23: Ka kynhun ïalehkai jong ka Myngken Christian Higher Secondary School, Bhoirymbong, ka la mih na nongbah Shillong hynnin ka sngi U Blei ha kaban ïa aireng sha ka lympung ïalehkai jong ka 2nd Indo-French Football Tournament, kaban sdang naduh ka 25 tarik mynta u Lber ha nongbah Paris, France.
Katkum ki jingtip ba la ïohlum, kane ka kynhun jong ka skul Myngken Christian HSS ka ban ïalam da u Bah Bobby. L. Nongbet (AFC A Licence Coach) uba dei ruh u District Sports Officer jong ka Ri-Bhoi District, ba kin ïakynduh bad hap ïatynjuh bor bad ki khynnah ïalehkai kiba la saiñ dur ha ki shlem ai jinghikai phutbol ba pawnam jong ki klob ïalehkai phutbol jong ka ri France.
Ki klob kiba ki khynnah ïalehkai jong ka Myngken kin ïakhun ki long ka FC Versailles, Bobigny FC, AAS Sarcelles Football bad Grigny FC. Nalor kata, ka kynhun kan ïoh ruh ïa ka lad ha kaban shah hikai ne ban ïa kilanmet bad ki khynnah jong ka shlem ai jinghikai ka Olympique Lyonnais, kaba dei kawei na ki klob ba pawnam jong ka France.
Shuwa ba ka kynhun kan mih na ka nongbah Shillong, na ka liang jong ka ophis treikam jong ka tnad Sports ka la pynlong ïa ka jingïalang ba kyrpang ban kitbok kitrwiang ïa kane ka kynhun, kaba la pynlong ha hotel Centre Point, ha ka sngi Saitjaiñ (22 tarik Lber).
Ha kane ka jingïalang la ïadon lang u President ka Meghalaya Football Association, u Bah Hamletson Dohling kum u Kongsan, u Director jong ka tnad ïalehkai – u D.D Shira, u Principal jong ka skul Myngken Christian HSS – u Bah Everlasting Pyngrope bad kumjuh u trai bad Chairman jong ka Shillong Lajong Football Club – u Bah Larsing M. Sawyan, lem bad kiwei de ki dkhot jong ka MFA bad SSA.
Haba ai jingkren ha kane ka jingïalang na ka liang jong u Bah Hamlet u la ong, “Ngi la ïohi ïa ka buit, ka sap bad ka mynsiem kaba phi don, bad dei lyngba kane ba phi la ïoh ïa kane ka lad ban ïashimbynta ha ka Indo-French Football Tournament ha Paris. Ngi ngeit ba phin pynliem ïa ki kynhun baroh bad phin wanphai ryngkat ka jingjop”. Shuh shuh, ula kyntu ïa ki khynnah ïalehkai ba kin long kiba don akor bad kiba don burom haba ki don jngai na la ka jong ka ri.
Ha kane ka kynti, ka MFA ka la wan shakhmat ba kan noh jingïarap 1 lak tyngka, kum ka dak ban ïa tynrong lem ïa ka jinglut jingsep na bynta kane ka skul.
Kumjuh ruh na ka liang jong u Director jong ka tnad Sports, u D D. Shira u la bynrap ba ka dei ka kabu kaba paka ïa ka kynhun ban mad ym tang ïa ka jingïalehkai ‘International Football’ hynrei wat ïa ka kolshor bad ka rukom im ha kiwei pat ki ri.
Nalor ka prokram kilanmet ka kynhun ka la shah hikai ruh ha ka rukom bam (table manner) ha kaba na ka liang jong ka Hotel Centre Point, lyngba u Arup Kakati ba dei artad u Director of Culinary jong kane ka hotel, ka la shim ïa ka bynta ba kan hikai ïa ki khynnah ban long kiba ryntih haba bam haba dih, la ka long kumno ba kin nang ban bat proh bat shamoit, kumno ban shim ne khat ïa ki bam bad kumta ter ter, namar kum ka ri Fracne, ka dei ka ri kaba bat bha ïa ki aiñ ki kanun ha ka rukom bam rukom dih.
Lah ban kdew hangne, mynta u snem ki don ar tylli ki skul ki jylla ka thaiñ shatei lam mihngi kiba ka Subroto Mukherjee Sports Education Society ka la jied ban mihkhmat ïa ka India sha ka Indo-French Football Tournament ha Paris, kine ki long ka TG English School na Manipur (lahduh jong ka Subroto Cup International Football Tournament), bad ka Myngken Christian HSS na Meghalaya.
Na bynta kane ka 2nd Indo-French Football Tournament, baroh ki jinglut jingsep yn bei da ka tnad ïalehkai jong ka Sorkar jylla. Ka kynhun kan kynthup ïa 16 ngut ki rangïalehkai, hapoh ka jingïalam jong u Bah Bobby L Nongbet kum u Coach, Bah Kitborlang Kharlukhi kum u Assistant Coach, bad u Bah Carmelius Ramshon kum u Manager.