Ryngkat ki jingduwai, pyllait ka FKJGP ïaka Ambulance ban shakri ïaki paidbah ka Ri Bhoi

Nongpoh, Ïaiong 14: Ka Federation of Khasi Jaintia and Garo People, North Khasi Hills District mynta ka sngi kala ioh ban pyllait syndon da ka Ambulance, ban ai ka jingshakri ïaki paidbah ka them Ri Bhoi ha kaba ïadei bad ka pang ka shitom.
Ïa katei ka Ambulance la wan ban pynlait paidbah da u Bah Eldie Newton Lyngdoh General Secretary ka FKJGP sengkmie, haka jingdonlang u Bah Elton Cliff Warjri Vice President ka sengkmie, u Bah Luistar Lyngdoh President ka North Khasi Hills District, Bah Lumlang Mawnai Senior Vice President, Bah Shanlang Diengdoh Secretary bad kiwei kiwei, ki nongkitkam bad ki dkhot ka seng bad naka liang ka seng kala buh ruh da ka jingduwai ban kyrkhu kyrdoh ïa katei ka ambulance haka jingïalang kaba la long ha ïing Dorbar Nongpoh.
Ïa katei ka Ambulance la sei ruh da ka seng ban shakri haka dong ka thain Ri Bhoi dei hadien ka jingud jingnam jong kiba bun ki paidbah khamtam ki longiing ba duk ba rangli namar ka jingjynjar bad duna ki Ambulance ban kit ïaki nongpang, bad dei haka jingïalam u Bah Luistar Lyngdoh kum u President.