Pynrem jur ka MFA ïa ki ‘riew bymman ba pynïap dusmon ïa ki doh-um Phot Mawpon

0

Mawkyrwat, Ïaïong 14: Ka Mawkyrwat Fishing Association (MFA) mynta ka sngi hadien ba ka la lap ïa ka jingshah pynïap dusmon ki doh-um doh-wah ha shi lynter ka Phot Umnew, Phot Mawpon bad Wahsala ka la pynrem jur ïa kane ka jingleh ki ‘riew bymman kiba la leh ïa kane ka kam khlem da pyrkhat ïa ka ïap jong ki kynja ba im bad khamtam eh ïa ka im ka ïap jong ki briew.
Haba kren ha ki lad pathai khubor, u Secretary jong ka Mawkyrwat Fishery Association (MFA), u bah S.W. Nongrum u la ong ba ki la don ki ‘riew bymman ki ‘riew shukor kiba la wan ban ai dawai bih ïa ki doh-um doh-wah kiba don ha shilynter ka Phot Mawpon ha kaba ki doh-um ki la per bad ïap lut. Ym tang kata, u la ïathuh ruh ba ki lad don ruh ki briew kiba la wan ban tam ïa kita ki doh-um kiba la per ha sla um ba ki la buaid dawai bad kita ki doh-um kiba la ïap kim duna shuh ïa ka 40 kilo ei ei.
Namarkata, u la buh jingmaham bad pynrem jur ïa ki ‘riew shim kabu ba haba ki leh ïa kum kine ki jait kam ki dei ban da pyrkhat ar sien shwa ban leh namar kano kano ka kam kaba sniew ne ban pynïap dusmon ïa ki doh-um da ki kynja dawai ka ktah ym tang ïa ki shimet hynrei ka ktah ruh ïa ki paidbah jong ka dong ka thaiñ.
U la ong ruh ba kine ki doh-um ki dei kiba U Blei U la thaw bad U la buh ha u khun bynriew ba un ri un sumar ïa ki, hynrei ngi ki briew pat ngi long pynban kita ki nongshun bad ngim pat sngewthuh haduh katno ka jingkordor jong ki bad ngi kwah beit ban ïoh shisien ïoh. “Ban wai khwai ki thait, hynrei ki ai pynban da ki kynja dawai bih kat haduh ba ki dohkha ki la ïap lut”, ong u bah Nongrum.
Ym tang ba na kane ka wah ki paidbah ki pyndonkam ban saitjaiñ hynrei don pat ki jaka ba ki pyndonkam ban ring um, kumta lada don kiba wan leh dusmon ban wan da ki dawai bih hato kan jia aiu ïa kita ki nongpyndonkam? U la buh jingkylli. Ha kajuh ka por u la buh ruh ka jingkyrpad ïa ki briew kiba la tam ïa ki dohkha ba shwa ban bam ki dei ban da pyrkhat ar sien namar ym lah ban tip ba ki kynja dawai aiu kita ki ‘riew bymman ki la wan ber ha kane ka wan namar wat ki bseiñ ruh ki ïap.
Kawei pat ka jingkyrpad bad ka jingmaham, u bah Nongrum u la phah ba na ka liang ka MFA ba lada ka dang lap ïa kino kino ki briew kiba ïa leh pyrshah da kaba ki rah tyngson, pynap musari, pynap jar, ai dawai ne siat ïa ki sim kiba don ha ki khlaw ba la mana na ka liang ka MFA kan kem, kan pynshitom bad kan aiti ha ki bor jong ka aiñ. Ha kajuh ka por ruh ki paidbah nongshong shnong jong kane ka dong ka thaiñ lada don ba ïap ki doh-um ha kane ka wah sngewbha wat nym tam ïa ki namar lada lap ïa kiba kum kita ki nongtam, ka MFA kan kem shwa ïa kita.
Ha kajuh ka por u la kren ruh ha kaba ïa dei bad ka khuid ka suba jong ki um ki wah da kaba u buh ka jingkyrpad ïa ki paidbah kiba dei na ki shnong bapher bapher ba kin ban don ka jingkitkhlieh na lade ïa lade halor ka khuid ka suba ym ban shu shaniah tang ha uwei ne ar ngut ban tam ïa ki jakhlia ne ki kynja plastic, ki kynja bilor kata naduh Phot-sohkrot haduh Wah-sala, namar lada baroh ki don ka jingkitkhliehlang kan nym don ka jingbym lah hynrei da ka jingïatreilang ynsa lah ban wanrah ïa ka khuid ka suba ha kylleng ki jaka.
Kaba khadduh eh, ka MFA ka buh ka jingmaham ba nangne shakhmat kan nym shah shuh ïa ki paidbah ba kin pyndonkam tynsong, khwai rop-way, ban pynap musari, pynap jar, bad don ha kine ki wah tam ïa ka 10 baje mynmiet bad lada lap ïa kiba kum kita yn kem bad pynshitom ïa ki.

Leave A Reply

Your email address will not be published.