Hap shimkhia ki bor shnong ban khanglad ïa ka jingrung ki nongkhaïi bar jylla

0

Nongstoiñ, Ïaïong, 14: Ka jingïohlad jong ki nongkhaïi bar jylla kiba leit tyrwa ïa ki tiar ki tar ha man la ki shnong ki thaw kum ki shylliah, ki kombor, ki tiar shet tiar tiew, ki jaiñ ki nep bad kiwei kiwei, ka dei ka kam ka bym ïa hap satia.
Kiba kum kitei ki nongkhaïi bar jylla, ki kynrei bha ha ki katto katne ki bynta jong ka West Khasi Hills naduh Rwiang haduh ki thaiñ Riangdo, Nonglang haduh Langja ter ter, namar ba ki kali kiba leit ba wan sha Assam ki kham kynrei.
Ka jingïoh lad jong kitei ki nongkhaïi bar jylla ban rung ban mih katba mon, ka pynduh nong shibun ïa ki nongkhaïi kiba dei ki trai shnong, namar ba kitei ki bar jylla tang ban lut ka mar ki die ha ka dor kaba tad, namar ban pynphai ruh ki shem shitom.
Ha kaba ïadei bad katei ka bynta imat, ka jingïoh rung laitluid jong ki ka dei na ka daw jong ka jingbym shimkhia jong ki bor synshar shnong. La lap ruh ba ki don ki nongsynshar shnong ba lada don kino kino ki samla shnong kiba kylli ne tohkit ïa kitei ki bar jylla kim ailad bad kim shah satia.
Hynrei, ka jingïoh rung jong kiba kum kitei ki briew, ym tang ba ka pynduhnong ïa ki nongkhaïi kiba dei ki trai muluk trai jaka. Hynrei ka buh ruh ïa ki khynnah khunlung bad ki kynthei ha ka jingma.
U Bah S.Lyngdoh na thaiñ Langja haba pynpaw ka jingsngewkhia jong u halor kane ka bynta, u la ong, “Katto katne snem mynshuwa, ki don kiba kum kitei ki nongkhaïi bar jylla kiba la leh ïa ki kam lute na bun ki longïing jong ki shnong bapher bapher kiba hap hapoh Mawshynrut Block. Hynrei ym shym la ïoh kem ïa ki namar ba mar shu dep leh ïa ki kam runar, ki la phet krad noh sha ki jaka ba ki wan.
U la ong ruh, “Teng teng haba ïoh bat ne kem bad haba kylli bad tohkit ïa ki, kim ju ïathuh hok ïa ka shnong bad ka jaka sah jong ki. Namarkata ki bor synshar shnong, kim dei ban ai lad ïa kiba kum kitei ki jaid briew ba kin wan rung klumar ha ki shnong ki thaw bad lada ki wan dei ban beh krad ïa ki”.

Leave A Reply

Your email address will not be published.