Halor ka jingdawa C&RD Block, ïamir jingmut ka KSU bad ki Sordar Shnong ha Umdohlun

0

Mawkyrwat, Ïaïong 14: Mynta ka sngi ka 14 tarik u ïaïong, 2023 na ka liang ka Khasi Student’s Union (KSU) jong ka Lai Hima Zone lyngba ka jingïamynjur lang bad ki Sordar Shnong jong ka thaiñ Umdohlun, Wahkaji kiba hapoh ka South west Khasi Hills District bad kiba hap hapoh jong ki Lai tylli ki Hima kata ha ka Hima Langrin, Nobosohphoh, bad jong ka Hima Nongstoiñ ki la ïoh ban pynlong ka jingïamir jingmut lang na ka bynta ban bud dien ïa kaei ba ki la pynsngew ha ka sorkar jylla ha kine ki sngi kiba la dep.
Lah ban kdew ba ïa ka jingïalang ba pynlong hapoh ka Dorbar Hall ha shnong Umdohlun, South west Khasi Hills District ha kaba ka jingthmu ka long ban bud-dien ïa ki Dorkhas ne ka Memorandum ba la dep ban phah ha u bah Hamlet Dohling halor ka jingdawa ban ïoh noh la ka jong ka C&RD Block ha ki ki thaiñ Umdohlun ne Wwahkaji bad kine ki jingpynsngew ruh ki dei ha kine snem ba la dep mynta ïa kaba ma u u dang dang bat kum u Myntri ba dei peit ïa ka Community & Rural Development jong ka jylla Meghalaya.
Namarkata, na ka liang ki nongïalam ka KSU bad ki Sordar hadien ba ki la dep ban ïa shong pyrkhat ki la ïoh ban pynshai ha ki lad pathai khubor ba na ka liang jong ki ha kine ki snem ba la dep ki la ïoh ban ai ïa ka Dorkhas ha u bah Hamlet Dohling, Myntri ba dei peit ïa ka Community & Rural Development ha kine ki snem ba la dep. Kumta halor kane ka jingdawa, mynta ka sngi ki la rai ba kin sa leit ban bud dien lyngba ka Joint Action Committee (JAC) jong ka KSU bad ki nong shynshar shnong ne Sordar shnong ban pynurlong ïa ki jingdawa jong ki.
Yn tang kata ki la rai ruh ba kin sa nang pynlong shuh shuh ki jingïalang paidbah haduh ban ïoh noh la ka jong ka C&RD Block ha kane ka thaiñ namar ba ha kine ki thaiñ Umdohlun ka la long shisha kaba donkam ban ïoh noh la ka jong ka C&RD Block namar ki paidbah ki la shem jingeh ban pyndep ïa ki kam ki jong ki haduh ha Mawkyrwat ne Ranikor ha kaba ki la hap ban ïaid da ki bun bun kynta bad don ruh ki shong kiba jngai namar ki hap ruh ban ïaid da kjat ki haduh ban da poi ha ophis jong ka C&RD Block khamtam hapoh Ranikor.
“Ki shnong kiba don ha kine ki thaiñ ki nym duna ne tam ïa ki 80 tylli ki shnong, kumta ka la biang pura ba kin ïoh noh la ka jong ka C&RD Block ha kane ka thaiñ”, la pynpaw u bah Dustarwell K. Lyngdoh, Secretary jong ka KSU Lai Hima.
Kiwei de kiba la ai jingkren ha kane ka sngi ki kynthup ïa u bah Shem-phang Nonglang, President ka KSU Lai Hima Zone bad na u bah Stalin Thongni u ba dei u Sordar Shnong Pynden-Umjarain, South West Khasi Hills District ha ka jingsakhi lang kiwei de ki dkhot jong ka KSU bad ki Sordar Shnong jong kane ka thaiñ.

Leave A Reply

Your email address will not be published.