Rung u Lamphang ba rim ka Assembly sha ka NPP, yn shah pynduh tiket u SG Esmatur Mominin

By Mawphor News Desk On Dec 4, 2022

Shillong, Nohprah, 03: U Lamphang barim jong ka Iingdorbar Thawaiñ ka Jylla u Abu Taher Mondal ha ka Sngi Saitjaiñ u la pynïasoh ïalade bad ka seng saiñpyrthei National Peoples’ Party (NPP) ha ka jingïalang kaba la long ha nongbah Shillong. Ïa u Mondal la pdiang sngewbha da u National President ka National People’s Party (NPP) u Conrad K. Sangma
U Conrad Sangma haba kren ha kane ka jingïalang u la pynbna syndon ba ka NPP kan ai tiket ïa u A.T Mondal ban ïakhun na Phulbari Constituency ha ka Elekshon sha ka Iingdorbar Thawaiñ ka Jylla ka ban sa long ha u snem 2023.
Da kane ka jingpynbna tiket ïa u Mondal, ka NPP kan pynduh tiket noh ïa u MLA ba mynta jong ka Phulbari Constituency u SG Esmatur Mominin uba la jop na ka tiket jong ka NPP ha u snem 2018.
Ha ka 29 tarik, Naiwieng, u AT Mondal u la phah ïa ka shithi resaiñ kum u Primary bad Active Membership jong ka Congress sha President jong ka Meghalaya Pradesh Congress Committee (MPCC),
“U AT Mondal u dei u briew uba la kham rim ha ka saiñpyrthei bad u briew uba ka jylla baroh kawei ka tip lut shaphang jong u. Ka jingwan pynïasoh jong u AT Mondal sha ka NPP kan pynmyntoi haduh katta katta ïa ka NPP,” u la ong.
“Ngim don jingartatien ba u AT Mondal un jop ïa ka elekshon na Phulbari bad nga kwah ba ki nongïalam kiba don ryngkat bad u kin ïatreilang kum kawei ka ing ka sem hapoh ka Party bad ngi donkam ban pynthikna ba un ïoh ïa ka jingjop ha u snem 2023 na Phulbari Constituency,” u la ong.
U la ong ruh ba u Mondal u dei u briew uba don beit ïa kajuh ka durkhmat kaba phuh samrkhie naduh ka por ba u dang long u Myntri Sorkar bad kum u Lamphang ka Ingdorbar Thawaiñ. U dei u briew u bym ju don ka mynsiem ñiew shiliang khmat ïano ïano ruh bad uba don ka mynsiem ïarap ïa baroh kiba donkam ïa ki jingïarap jong u.
U la ong shuh shuh da ka jingpynïasoh jong u Mondal sha ka NPP, ka rithor jong ka rilum Garo kan sa don ka jingkylla. “Ym tang ha Phulbari Constituency hynrei wat ha kiwei kiwei de ki Constituency,” u la bynrap.
U Sanmga u la ïathuh ruh ba ha ka taiew baar lane ka taiew balai ha une u bnai, da lade hi un sa hiar sha ka shnong Phulbari ban lum ïa ki paidbah nongkyrshan jong u AT Mondal.
U AT Mondal haba kren ha kane ka jingïalang u la ong ba katkum ka jingshem jong u naduh ba u la rung sha ka jylli jong ka saiñpyrthei ha u snem 1998, ka jingskhem jong ka Sorkar ka dei kaba kongsan tam khnang ba ki kam pynroi kin poi thikna sha ki paidbah nongshong shnong ka jylla.
“Ha u snem 1998, nga ïohi ba mih haduh san tylli ki Sorkar tang hapoh san snem. Ka jingkhyllem ki Sorkar kan pynkylla ruh ïa ki prokram bad ki polisi bad dei ki paidbah ki ban mad ïa ka jingduhnong,” u la ong.
“Mynba nga dang don ha ka seng Congress ruh nga la ïohi ïa kajuh haba ka don ka jingïaknieh watla don ha kajuh ka party,” u la ong bad bynrap, “ngi donkam ïa ka jingïatreilang.”
U la ïaroh ruh ïa ka skhim FOCUS+ ba la wanrah da ka Sorkar MDA. “Ka FOCUS+ kan pynmyntoi haduh katta katta ïa ki nongrep ha rithor jong ka rilum Garo, khamtam haba ngi ïohi ba ka Sorkar ka ai jingïarap da ki symbai khun sniang, ki tynrai jingthung sha ki paidbah ba kin dup lah ban pynheh ïa ka kamai kajih,” u la bynrap.
“Dei lyngba kine ki jingtreikam jong ka Sorkar kaba la pynlong ïa ki nongbud jong nga ban kyntu ba nga dei ban ïatreilang bad ka NPP,” u la ong shuh shuh.
Shuh shuh u la ong ba ka jingkyntiew kyrdan jong ka Sorkar ïa ki C&RD Block ka dei kawei na ki lad ban wanrah ïa ki song pynroi sha ki paidbah.
“Ngi khmihlynti ba ka NPP hapoh ka jingïalam jong u Conrad Sangma kan sa plie noh ïa kawei ka C&RD Block ha Phulbari Constituency kaba ki paidbah ki la angnud la slem khnang ban pynïajan ïa ka jingtreikam ka sorkar sha ki paidbah kiba sah sha ki shnong ki jngai,” ong u Mondal.
Katkum ka jingïathuh jong u Mondal baroh ki nongkyrshan jong ka Seng Congress ha Phulbari ki la mynjur ban bud lang ïa u sha ka NPP hadien kane ka jingpynïasoh jong u sha kane ka party ha nongbah Shillong ïa kaba la pyni Live lyngba ka Facebook. Ha kane ka jingïalang, la sakhi lang da u Working President u Dr. Don Kupar War, u Working President ka Phulbari Constituency u Albistone A. Sangma bad kiwei kiwei ki nongkitkam jong ka party.