Shillong, Nohprah, 03 : U Bah Martle Mukhim uba long u President jong ka Hill State Peoples Democratic Party (HSPDP) East Khasi Hills District ha ka sngi Thohdieng u la lum ïa ki paidbah jong ka thaiñ Mawryngkneng kiba na ka thaiñ Puriang, Kut, Mawlynrei, Mawpdang, Diengpasoh bad kiwei kiwei ki shnong kiba hap hapoh ka Mawrynkneng Constituency ban pynshai ïa ki nongrim treikam jong ka party bad kumjuh ruh ban pynkhlaiñ ïa ka HSPDP kum ka jingpynkhreh ïa ka Elekshon sha ka Ingdorbar Thawaiñ ka ban sa long ha u snem 2023.
Ha ka jingïalang kaba la long ha ïngdorbar jong ka Nongshilliang, Nongthymai, Shillong, u Bah Mukhim u la pynshai ïa ki nongrim treikam jong ka HSPDP bad hadien kane la pynskhem ïa ki nongkyrshan kiba la pynïasoh bad ka HSPDP ha kane ka sngi.
Na ka bynta ban pynïar bad ban pynkhlaiñ biang ïa ka Party ha Mawryngkneng Constituency ka jingïalang ka la rai ruh ban thung ïa u Bah Andrew Sohlang kum u Convener ryngkat bad u Bah Wyraiwan Sohtun kum u Co -convener.
Ha kane ka sngi la ïa rai ruh ban pynlong da ka jingïalang bad ka jingïakynduh lang kaba kham heh jong ki riewrangbah, ki longkmie, ki khun samla jong ka Constituency baroh kawei ha ka 9 tarik mynta u bnai ha ka shnong Tynring.
