Shillong, Nohprah 03 : Ka ophis jong u Commissioner for Persons with Disabilities, ka sorkar jylla ha ryngkat ka jingïatreilang bad ka State Resource Centre on Disability Affairs, Shillong hynne ka sngi ka la rakhe ïa ka sngi kyrpang kiba don jingthut ha ki dkhot met lane ka International Day of Persons with Disabilities ha ka jingïalang kaba long ha U Soso Tham Auditorium, Shillong halor ka phang pdeng “Transformative solution for inclusive development: the role of innovation in fuelling an accessible and equitable world” ha kaba u Myntri ka tnad Social Welfare, Bah Kyrmen Shylla u la long u Kongsan.
Haba kren ha ka jingïalang, u Myntri u la ong ba ka thong jong katei ka jingrakhe man u snem ka long ban pynjur shuh shuh ka jingai jingpynshai halor ki mat kiba ïadei bad kito kiba thut ki dkhot met bad ki jingmyntoi kiba ki dei ban ïoh.
Da kaba banjur halor ka phang pdeng mynta u snem, u Myntri u la kyntu ruh ïa baroh ba kin lang kawei ka sur na ka bynta ban wad ki lad ki lynti kiban long ka jingmyntoi ïa kitei ki ba don jingthut ha ki dkhot met ban pyntikna ba kin ïoh bynta pura lut ha ka imlang sahlang.
Nalorkata, u ong ruh ba da ka thong ban kyntiew bad pynkupbor ïa kitei ki briew ba don jingthut ha ki dkhot met, ka sorkar jylla ka la pyntreikam bun ki skim ne ki prokram na ka bynta jong ki khnang ba kin lah ban kiew lang arted ha ka imlang sahlang kynthup naduh ka jingpyntreikam ïa ka Accessible India Campaign.
U la pyntip ruh ba dang shen ka sorkar ka la kyntiew ruh ïa ka Chief Ministers Pension scheme, ka Unemployment Allowance bad ka sorkar ka la ai ruh ka song jingkyrshan pisa na ka bynta kito kiba nonghikai ba kyrpang. U la pyntip ruh ba lyngba ka Meghalaya Signbank App, ka sorkar jylla ka la ïaid shakhmat ban long ka jingkieng kaba pynïasoh ïa baroh bad kito kiba don ka jinglong ba kyrpang.
Ha kane ka sngi, u Myntri u la pynkup burom kyrpang ruh ïa kito ki paidbah kiba la aiti bad ai ka jingshakri met bad mynsiem na bynta kiba don ka jinglong ba kyrpang. Nalorkine, ki don ruh haduh 12 ngut ki nongïoh jingmyntoi kiba la ïoh ïa ki song jingïarap bad arngut pat ki la ïoh ïa ki UDID card.
Mawjrong : Ha kane ka sngni, ka ophis jong ka District Social Welfare Officer, East Khasi Hills District ka la snohkti lang ban rakhe ïa katei ka sngi ba kyrpang ha ka jingïalang kaba long ha Mawkdok, Laitkroh Khaarshnong Block.
La donlang ha kane ka sngi naduh ka Kong N. Umdor, District Social Welfare Officer, East Khasi Hills District, Bah W. Nongrum, Rangbah Shnong bad ki heh sorkar na ki tnad bapher bapher jong ka sorkar.
