Plie u Myntri Rangbah ïa ka Mini Secretariat bad ka jaka sumar MCH ha Panaliar Jowai

Jowai, Nohprah 03: U myntri rangbah ka jylla u Conrad. K. Sangma mynta ka sngi saitjaiñ ula wan ban plie ïa ar tylli ki mawnongrim ha Jowai, kata ban shna ïa ka Integrated Development Complex (Mini Secretariat) bad ban plie paidbah ïa ka Maternal & Child Health Hospital kaba don 100 jingthiah ha Panaliar Jowai.
Ha kane ka sngi la pynlong ïa ka jingïalang ha phyllaw ka PWD Jowai ha ka jingdonlang u myntri ka Urban Affairs Tourism u ma Sniawbhalang Dhar, u MLA ka Jowai ma Wailadmiki Shylla, u Deputy Commissioner ka West Jaiñtia Hills District bah Batlang S. Sohliya IAS, u Chief Executive Member ka JHADC ma T. Shiwat nalor ki kynrem ki lyngdang, ki nongrep bad ki paidbah nongshong shnong.
La ïathuh ba ïa kane ka Integrated Development Complex (Mini Secretariat) la tip ïa ka kum ka District Secretariat ïa kaba la mang pisa kumba T.20 klur tyngka da ka GAD jong ka sorkar jylla bad ka jingpyntrei kan sdang noh shen ïa ka ha Ladthadlaboh PWD West Jaiñtia Hills District.
Na ka liang u Myntri Rangbah ha ka 7.11.2020 ula wan ban jurip nyngkong ïa kane ka jaka bad ula kular ban shan ïa kane ka Mini Secretariat na ka bynta ka jingmyntoi jong ki paidbah nongshong shnong jong ka District hi baroh kawei.
Katkum ka plant ban shna ïa kane ka Complex ka long da ka G+3 Storey Building kaba don lai bynta ka Block (East, West bad North Block) kaba lah ban kot haduh 40 klur ha ka jingheh jong ka jaka kaba 14700 sqm lane 3.63 Acer.
Ha kane ka ophis ym pyntreikam ïa kiba bun ki tnad sorkar kum ka DC office kaba kynthup ruh ïa ki tnad kum ka Election Branch, Supply, Revenue, Planing, Basin Development, Social Welfare, District Child Protection, ka tnad Sports, Treasury officer, Excise, IPR, Tourism, Border Area, Mining bad kiwei de ki tnad sorkar kiba dang treikam mynta ha ki ïing wai jong ki riew shimet.
Katba ïa ka Maternal & Child Health Hospital kaba don 100 jingthiah ha Panaliar Jowai la buh mawnongrim ba tei naduh ka 5 tarik u March 2014 hynrei la pyndep ban shan ïa ka ha ka snem 2017 bad mynta ka sngi la wan ban plei ïa u mawnongrim da u myntri rangbah ka jylla ha kane juh hi ka jaka ba pynlong jingïalang.
Kane ka jaka sumar kan ai jingsumar kyrpang ïa ki longkmie ba armet bad ki khynnah napoh ka District, la ïathuh ba hapoh ka District ka jingbun briew kala poi sha ka 4 lak katba ki longkmie ba armet bad ki khynnah ki don 9299 bad 8932 ngut.
Na ka bynta ki nongtrei la dep ban appointed ban pynïaid ïa kane ka jaka sumar kynthup ar ngut ki Pediatrician bad 2 ngut ki OBC Specialists ha ryngkat ki Staff Nurse bad kiwei de nongtrei kiba dang trei mynta ha Jowai Civil Hospital Ialong.
U Myntri Rangbah haba ai jingkren ula ong ‘ki don hangne ban pynkiew ïa ka jylla hi baroh kawei wat lada ki don shibun kiba kynthoh na kiba bun ki liang’, na ka liang ka sokar ruh kala ïaleh ban pynbha ïa ka jingshakri ha ka liang ka koit ka khia.
Ula ong hapoh ka ka jylla la dep ban pynkiew sha ka 1000 tylli ki jingthiah ha ki jaka sumar ha kine kip or jong ka khlam Covid-19 bad Haduh 250 klur la dep pynlut ha ka ban shna ïa jaka sumar naduh ki Sub Center, ki Laboratory, ki jaka thiah bad kiwei kiwei de.
Ula ong ba ka jylla ka la don ha ka kyrdan kaba saw (4) hapoh ka Ri kaba la pynlut buh eh ka pisa ha ka liang ka koit ka khiah, ula pyntikna ba ka sorkar kan ïaleh ban pynbiang sa ïa ki Doctor katkum ka jingïateh kaba la dep ban ïasoi.
Ha kane ka sngi na ka liang u Myntri Rangbah ula sam ruh ïa ki synbai sha ki nongrep ka District.