SHILLONG, Nailur 07: Ka Smit SC ka la pynkhihjar ar sien ha ki minit pynjlan ban pynliem noh da 2-1 kol ïa ka Lawsohtun SC ha ka Quarter final jong ka Second Division Football 2026 ba la pynïaid da ka Shillong Sports Association, hynne ka sngi Nyngkong ha SSA Stadium
Haba phai sha ka jingïakhun, dei ka Lawsohtun kaba la pynkhihjar nyngkong lyngba u Siewdor Nongbri ha ka minit kaba 79, hynrei ka Smit ka la trei shitom tad haduh ba kan da ïoh ban pynïakhaid ha ki minit pynjlan lyngba u Pynshailang Kharsyntiew (90+2’) bad nangta u Nathanial Kharbangar (90+5’) u la thep ïa ka kol kaba ar ban khur ïa ka jingjop.
Haba phai sha ka jingïalehkai ha MFA Ground, ka Jongksha SC ka la pynthikna ïalade ban ïaineh ha ka Second Division ha ka samoi ban wan, da kaba bteng ïa ka jingjop ha ka jingïakhun Bottom League hadien ba ka la pynliem noh da 8-2 kol ïa ka Mawkriah West SC.
U Wallambok K Sahnoh (49, 68 & 82’) u la thep hat trick katba u Bishar Nongspung (32 & 80’) bad u Babianghok Mynsong (37 & 45’) ki la pynkhihjar mar ar sien, u Khrawbhalang Songthiang (55’) u la bynrap kawei na ka bynta ka Jongksha.
Ki ar kol jong ka Mawkriah West la thep da u Dibarson Kharbudnah 928 & 58’).
Ka Jongksha SC ka la jop ïa ka jingïalehkai Bottom League ba nyngkong da 8-1 pyrshah ïa ka Lumshyiap.
Ka jingïakhun Quarter final jong ka SSA 2nd Division 2026 ha kane ka sngi Ba-ar (08.09.2026) kan long hapdeng ka Madan S&CC pyrshah ïa ka Mawryngkneng SC. Kane ka jingïalehkai kan sdang ha ka por 3:15 baje nohphai sngi ha SSA Ground.
