Shillong, Nailur 07: Ka Shillong Sports Association (SSA) kan sdang ïa ka lympung phutbol First Division jong u snem 2026 ha ka 16 tarik Nailur da 10 tylli ki kynhun ba ïashim bynta.
Ka lympung kan ïaid ha ka rukom ïalehkai kaba thymmai, ha kaba la phiah ïa ki 10 tylli ki kynhun ha ki ar tylli ki Group (A & B) kaba mar san tyli ki kynhun ne klob. Kawei pa kawei ka kynhun kan ïakhun shi sien ïa kawei pat kaba don ha kajuh ka Group bad ki ar tylli ki kynhun ba pyndep ha khlieh duh na kawei pa kawei jong kine ki ar tylli ki Group kin ïohrung sha ka Semifinal.
Ki ar tylli ki kynhun ba poi sha ka Semi final kin shah kyntiew kyrdan sha ka Shillong Premier League na ka bynta u snem 2027, nangta kin ïoh ruh ban ïashim bynta ha ka SSA Champions Cup 2026.
Kin don ruh ki jingïakhun ban lait shah pynhiar kyrdan (bottom league) na ka bynta ki ar tylli ki klob ba wan sha trai duh na kawei pa kawei na kine ki ar tylli ki Group, ha kaba kin ïakhun mar shisien kawei ïa kawei pat, nangta ki ar tylli ki kynhun kiba pyndep sha trai duh kin shah pynhiar kyrdan sha ka Second Division na ka bynta u snem 2027.
Kine ki long ki kynhun ban ïashim bynta ha ka SSA 1st Division 2026:
Group A: Malki SC, Laitkyrhong SC, Nongkrem SC, Mawtawar SC bad ka Nongthymmai SC.
Group B: Nongrim Hills SC, Mylliem Lum SA, Pohkseh SC, Ryntih SC bad ka Mawkhar SC.
