Rung ka kot ‘Everything the Light Touches’ ka Janice Pariat ha ka thup JCB Prize for Literature 2023

New Delhi, Nailur, 02 Kawei na ki khusnam jong ki kot ha India, ka JCB Prize for Literature, ka pyllait paidbah ïa ka Longlist na ka bynta ka Khusnam kaba hynriew. Ki Nongbishar kiba na ki jaidbynriew bapher bapher, ka kynthup ruh ïa u Srinath Perur, uba dei u nongthoh bad u nongpynkylla ktien, ki wanrah ïa ka Longlist kaban khring ïa kito kiba thoh kot ha kylleng ka pyrthei.
Ki Nongbishar ki la pule lut ïa baroh ki kot kiba na ka ri baroh kawei, kiba shim bynta ha kane ka jingïakob, kaba kynthup ïa ki kot jong ki nongthoh kiba na 24 tylli ki shnong bapher bapher, ba la thoh ha phra tylli ki jait ktien, kaba la thoh nyngkong shuwa ha ka ktien Phareng. Saw tylli ki jingpynkyllaktien na ka Bengali, ka Hindi, bad ka Tamil ki la don ha kane ka Longlist, ryngkat bad hynriew tylli ki kot ba la thoh nyngkong eh ha ka ktien Phareng. Ki nongthoh kum u Manoranjan Byapari bad u Perumal Murugan, kiba la ju mih kyrteng (longlisted) ar sien mynshuwa ha kum kane ka Khusnam, sa shisien pat ka kyrteng jong ki ka la mih biang na ka bynta kane ka Khusnam, bad sa uwei pat u nongthoh, u Tanuj Solanki ruh u la mih kyrteng biang ha ka sien kaba ar mynta. U Hansda Sowvendra Shekhar, uba la mih kyrteng (longlisted) mynshuwa kum u nongthoh, mynta pat u mih kyrteng biang hynrei kum u nongpynkylla ktien na ka bynta ka kot hindi jong u Manoj Rupda, bad kane ka dei ka jingpynkylla ktien kaba nyngkong eh kaba u Hansda u la pynkylla.
U Geet Chaturedi u la paw kyrteng mynta u snem na ka bynta ka kot banyngkong ba u la thoh, kaba la pynkylla ktien da ka Anita Gopalan, kaba dei ka jingpynkylla ktien kaba nyngkong jong ka ha ka fiction (ka khana kaba la shu mutdur). Ka Tejaswini Apte-Rahm ruh ka la mih kyrteng na ka bynta ka kot Phareng jong ka kaba nyngkong ba ka la thoh, bad ruh u Bikram Sharma na ka bynta ka kot banyngkong jong u.
Ki Nongbishar jong kane ka Khusnam jong u snem 2023 ki kynthup ïa u Srinath Perur (u Chairman), uba dei u nongthoh bad u nongpynkylla ktien; u Mahesh Dattani, uba dei u playwright (u nongthoh khana ban ak) bad u stage director; u Somak Ghoshal, uba dei u nongthoh, u critic bad u learning designer; ka Kavery Nambisan, kaba dei ka nongthoh kot bad ka doctor; bad ka Swati Thiyagarajan, kaba dei ka conservation journalist bad ka nongshna phlim.
Ka Longlist jong u snem 2023 ki long: The Secret of More ba la thoh da ka Tejaswini Apte-Rahm (Aleph Book Company, 2022), The Nemesis ba la thoh da u Manoranjan Byapari, bad ba la pynkyllaktien na ka Bengali da u V. Ramaswamy (Westland Books, 2023), The East Indian ba la thoh da ka Brinda Charry (HarperCollins Publishers India, 2023), Simsim ba la thoh da u Geet Chaturvedi, bad ba la pynkyllaktien na ka Hindi da ka Anita Gopalan (Penguin Random House India, 2023), Fire Bird ba la thoh da u Perumal Murugan, bad ba la pynkyllaktien na ka Tamil da ka Janani Kannan (Penguin Random House India, 2023), Everything the Light Touches ba la thoh da ka Janice Pariat (HarperCollins Publishers India, 2022), Mansur ba la thoh da u Vikramjit Ram (Pan Macmillan India, 2022), I Named my Sister Silence ba la thoh da u Manoj Rupda, bad ba la pynkylla ktien na ka Hindi da u Hansda Sowvendra Shekhar (Westland Books, 2023)
The Colony of Shadows ba la thoh da u Bikram Sharma (Hachette Books, 2022), Manjhi’s Mayhem ba la thoh da u Tanuj Solanki (Penguin Random House India, 2022)
Haba kren shaphang ka Longlist jong u snem 2023 bad ka jingïaid lynti jong u ban pule ïa ki kot, u Srinath Perur, u Chairman jong ki Nongbishar, u la ong, “Ki kot ba la pynrung mynta u snem ha ka Khusnam ki long dashisha hi kiba khlaiñ bad kiba pher iwei na iwei. Ki nongbishar ki la pule ïa kine ki kot ha ki bnai ba la leit, bad ngi kynduh lyngba ka online man la ka shisien ha ka ar taïew. Ngi pule ïa ki kot bathymmai, ban myntoi, ban pyndep ïa ka kam bad ka thong, bad kiwei kiwei de ki daw. Ngi pule ruh namar ba ngi sngewtynnad ban pule kai ïa ki kot. Bunsien ngi ju ïa mynjur, hynrei haba ngim ïa mynjur, ngi ju phai pat sha kiwei ki kot ban sngewthuh na kawei pat ka liang. Katkum ki kot ba ngi la pynrung, ka lah ban long kaba suk ban jied thymmai napdeng jong ki. Hynrei, man la iwei pa iwei i dkhot jong ki nongbishar ki la shem ïa kaei kaei kaba kyrpang shaphang baroh kine ki shiphew tylli ki kot. Haba la kyllum lang ïa kine ki kot baroh, kine ki kot ki thew ïa ka jingbha jong ki kot novel ha India ba la pynmih ha ka ktien Phareng myn shem snem.”
Haba peit biang ïa ka jingïaid lynti jong ka JCB Prize for Literature, ka Mita Kapur, ka Literary Director, ka JCB Prize for Literature, ka la pynpaw ïa la ka jingsngew kumne, “Ka kyrteng jong ki kot ba la mih na ka bynta ka Khusnam (ka Longlist) jong u snem 2023 ka pyni shisha ïa ka jinglah bha jong ki kot khana fiction ha India. Ka long ka kabu ksiar ban rakhe ïa kine ki shiphew tylli ki kot kaba pynriewspah shuh shuh ïa ka jingim jong ngi, ban shem ïa ka jingsngewthuh ka jong ngi ba kumno ngi ïohi ïalade lyngba ka jingkyrpang, ka jingsatlup, ka jingbhabriew, ka jingsniew dur, bad ka jingphylla jong ka jingdon ka jingim u briew. Ka Longlist jong mynta u snem ka thmu ban kem, ban pynlyngngoh, bad ban pynsngewtynnad ïa baroh ki nongpule kiba pule ïa kawei na kine ki kot.”
Manla u snem, ka JCB Prize for Literature ka ai burom ïa u nongthoh kot ka ri India, uba tbit ba pynmih ïa ka kot fiction. Yn pyllait paidbah ha ka 18 tarik u Naiwieng ïa ka Shortlist jong ki san tylli ki kot ba la shah jied shuh shuh bad yn ai buskit da ka pisa kaba 25 Lak T. Lada kata ka kot kaba ïoh khusnam ka dei ruh ka jingpynkyllaktien, u nongpynkylla ktien un ïoh shuh shuh ka buskit sa 10 Lak T. Shuh shuh, baroh na ki 5 ngut kiba la paw kyrteng khatduh (shortlisted) kin ïoh ka buskit ba 1 Lak T. lada dei ki nongthoh, bad lada dei ki nongpynkyllaktien pat kin ïoh 50,000 T.
SHAPHANG KA JCB PRIZE FOR LITERATURE
La seng ïa ka JCB Prize for Literature ha u snem 2018, khnang ban wanrah burom ïa ka thoh ka tar ha India bad ban pynsaphriang ïa ka jingtip shaphang ka thoh ka tar. Kane ka khusnam ka pynshlur ban pynkylla ktien ïa ki kot bad ka thmu ban wanrah sha ki paidbah ïa ka jingtip shaphang ki kot ba la thoh ha India ha ki jait ktien lait lait na ka jait ktien la jong. La kyrshan pisa ïa kane da ka JCB bad ka JCB Literature Foundation ka peit ïa kane.
Ban tip shuh shuh shaphang kane ka Khusnam, sngewbha leit sha kane ka website: www.thejcbprize.org. Na ka bynta ki jingpyntip kiba thymmai, peit ha ka @thejcbprize jong ka Facebook, Twitter bad Instagram.