Shillong, Nailur, 02: Ki shipai BSF ka 181 Battalion kiba ap pahara ha khappud ka Jylla Meghalaya, ha ka jingïatreilang bad ki Pulit ka Meghalaya hadien ba ki la ïoh jingtip kaba bniah na ki tnat syntiat ki la pynlong ka jingap ktem ha kaba ki la ïoh ban kurup ïa ki dawai Phensedyl, ka kyiad bad ka shini na khappud jong ka South Garo Hills bad ka East Jaiñtia Hills Districts ïa kiba la thmu ban shalan be-ain sha ka ri Bangladesh.
Katkum u kyrwoh ba la phah sha ki lad pathai khubor, ki shipai BSF bad ki Pulit ki la ïoh kurup 3,100 hajar bilor ka dawai jyrhoh Phensedyl ba la thmu ban shalan beain sha Bangladesh lyngba ka khappud jong ka West Garo Hills. Ïa kine ki dawai la aiti noh sha ki Pulit jong ka PS- Dobasipara ban leh ïa kaba donkam katkum ka aiñ.
Ha kawei pat ka jingkhynra, ki shipai BSF jong ka 172 Battalion kiba ap pahara ha Mobile Check Post ha Sonapur, ki la ïoh bat ar tylli kali Bolero Pickup kiba kit 15 synduk ka kyiad bad 32 byrni ka shini na khappud ka East Jaiñtia Hills.
Haba la tohkit, ki nongñiah jong kine ki ar tylli kali bad ki nongbud kim shym la lah satia ban pyni ïa ki kot ki sla ba la ïoh jingbit ban kit ïa kine ki mar bad ki la sdang ban kren kyllaiñ da kumne kumtai.
Mar mar ki shipai BSF ki la kurup noh ïa ka kyiad bad ïa ka shini.
Ïa kine ki briew kiba la ïohbat da ki BSF ryngkat bad ki mar khaii la aiti oh sha ki Pulit jong ka Umkiang Police Station ban leh ïa kaba donkam katkum ki kyndon jong ka aiñ.
