Rung final ka EKH bad Ri Bhoi ha ka phutbol kynthei, ka Ri Bhoi & WKH ha ka U17 Boys

Jowai, Kyllalyngkot 22: Ki jingïalehkai semi-final ha ka phutbol kynthei (Women Senior Football) ha ka 6th Meghalaya Games 2025, kaba la long ha Kiang Nangbah Stadium, Jowai.
Ha ka jingïalehkai kaba nyngkong, ba la long ha ka por mynstep, ka Ri Bhoi District ka la pynliem noh ïa ka West Jaintia Hills District da 2-0 kol. ïa kine ki kol la thep da ka Daphisha Syngkli (Jersey No. 15) bad ka Pynibha Rangthaluh (Jersey No. 03), ban rung sha ka final baroh ar sien lynter ha ka Meghalaya Games.
Ha ka jingïalehkai semi final kaba ar, ka East Khasi Hills District ka la pynliem ïa ka South West Khasi Hills District da 2-1 kol. Ka Sanfida Nongrum (Jersey No. 10) ka la long ka namtam ha kane ka jingïalehkai, da kaba thep baroh ar kol na bynta ka East Khasi Hills, katba ka Darishisha Kharlyngdoh (Jersey No. 2) ka la ïoh ban thep ïa ka kol na bynta ka South West Khasi Hills.
Haba phai sha ka semi-final jong ki shynrang ha ka kyrdan Under-17, baroh ar tylli ki jingïalehkai ki la poi sha ka tie breaker. Hadien ba khlem shym la lah pynkhihjar haduh kaba kut jong ka por, ka Ri Bhoi ka la lah ba kan pynliem ïa ka West Jaintia Hills da 4-3 ha ka tiebreaker.
Ka jingïalehkai kaba ar la sakhi ïa ka West Khasi Hills kaba la pynliem noh ïa ka Southwest Khasi Hills, da 5-4 ha ka tie breaker.