Shillong, Kyllalyngkot 18 : Ka kynhun ïalehkai kriket ki thei ka Meghalaya ki la mad nam rem ha kaba sdang jong ka lympung ïalehkai Senior Women’s One Day Trophy.
Ka Meghalaya ka la mad nam rem da khyndai wicket hakhmat ki thei ïalehkai ka Mumbai ha ka jingïalehkai hynne ka sngi Balang ha Nagpur.
Ka Meghalaya ka la dei ban jop pyrshah ïa ka Mumbai hynrei ka (Mumbai) ka la lehkai kham bha ha kaba ka Meghalaya ka donkam ban nang pynjanai ha ka rukom ïalehkai.
Ka Mumbai kaba la jop ïa ka jingkynting pisa ka la kam ban kawang bol nyngkong bad ka la lah ban khanglad ïa ka Meghalaya ban kamai 130 ron bad duh noh 8 wicket ha baroh ki 50 over. Ki thei tied ka Meghalaya kiba la kamai bun ron ki kynthup ka Sejal Raut kaba dei ka guest professional kaba kamai 44 ron abd ka Vaincy Chaudhary ka kamai 24 ron.
Ka Suriti Kumari Ray ruh ka la ïarap kamai 22 ron da kaba khyrwit san tylli ki boundary ha kaba ma ka lem bad ka Raut ki la buh 45 ron ha ka jingduh noh ki ar wicket.
Ka Mumbai haba beh ïa katei ka thong ka la lah ban pyndep tang ha ki 21.2 over bad duh noh tang shi wicket. Kaba la ïoh ban shim wicket na ka bynta ka Meghalaya kadei ka Debasmita Dutta kaba ai kamai 30 ron.
Ka Meghalaya lashai ka sngi Palei kan aireng ïa ka Rajasthan. Ka Rajasthan ka la jop ïa ka jingïalehkai kaba nyngkong da kaba pynliem da phra wicket pyrshah ïa ka Pondicherry. Ha ka Group C nalor ka Meghalaya kiwei pat ki team ki kynthup ka West Bengal bad ka Assam.
