Shillong, Kyllalyngkot 01 : Ka Himachal Pradesh ka la pynliem ïa ka Meghalaya da ka inning bad 124 ron ha ka lympung ïalehkai kriket U-25 Col CK Nayudu Trophy ha ka jingïalehkai ha ka sngi Balang ha Lucknow.
Haba bteng biang ïa ka 64 ron duh noh 5 wicket ha ka sngi kaba lai jong ka inning kaba nyngkong, da kaba beh ïa ka 419/6 wicket jong ka Punjab, ka Meghalaya ka la shah pynhap lut baroh ki wicket da kaba kamai tang 155 ron, bad ka la hap ban beh biang ha ka inning kaba ar hynrei ka la shah pynkhyllem lut baroh ki wicket da kaba kamai tang 140 ron.
U Jaskirat Singh Sachdeva u kamai 45 ron ba la ïarap kamai ron lang da u Ram Gurung (17) bad u PM Santhosh (34). U Sachdeva bad u Santhosh ki kamai ron lang da 68 ron ha ka wicket kaba phra.
Ha ka inning kaba ar, ka Meghalaya ka la duh kloi noh ïa ki ar wicket hynrei ka la lah ban kamai ron lyngba u Swastic Chettri (17) bad u Kevin Christopher (37). U Kevin Christopher u la kamai ron lang da 55 ron ha ka jingduh noh ïa ki san wicket ha ryngkat u Joydeepan Deb (44).
Ka Meghalaya kan pynkhreh ban ïakhun pyrshah sa bad ka Odisha ha ka 5 tarik Rymphang.
