Shillong, Rymphang 11: Ka long ka jingjop kaba khraw ïa ka jylla, hadien ba ka kynhun kriket Meghalaya hynne ka sngi ka la ïohrung sha ka final ha ka lympung Ranji Trophy 2023-24 na ka thup ïakhun Plate Group, bad da kane, ka la pynthikna ïalade ban ïoh ïakhun ha ka thup Elite Group ha ka samoi ban wan.
Ka Meghalaya ka la pynliem noh ïa ka Mizoram ha ka jingïakhun semifinal plate Group hynne ka step Sngi U Blei ha Mangaldai, Assam, da 6 wicket, hadien ba donkam tang 28 ron ban jop. Haba beh ïa ka thong kaba 153 ron na bynta ban khur ïa ka jingjop, ka Meghalaya ka la pyndep ïa ka pali tied hynnin ka sngi da 125/4 ha ka inning tied kaba ar, ha kaba u kapten ka kynhun-u Kishan Lyngdoh (34 not out) lem bad u Jaskirat Singh Sachdeva (19 not out) kiba dang ïaineh.
U Kishan bad u Jaskirat ki la lah ban tied pyndep ïa ka ron ba dang sah tang hapoh shiteng kynta hynne ka step. U Kishan u la tied ïa ka san phew ron (half-century) kaba saw ka jong u ha ka Ranji Trophy mynta ka samoi, da kaba pyndep ïa ka inning kaba ar da 53 ron, katba u Jaskirat u la tied 31 ron.
Haba phaidien, ka Mizoram ka la tied nyngkong bad kynjoh 144 ron, ïa kaba ka Meghalaya ka la jubab da 145 ron. Hadien kane, ka Mizoram ka la shah pynhap noh tang hadien 153 ron ha ka inning tied kaba ar. U Aryan Borah bad u Akash Kumar Choudhury ki la seisoh bha ha ka bol na bynta ka Meghalaya, ha kaba u Akash u la khur 8/69, katba u Aryan u la khur 10/107 bad ban khur syndon ïa ka nam Player of the Match ar sien lynter..
Na ka liang jong ki dkhot ba la rangbah jong ka Meghalaya Cricket Association ki la ai ka jingïaroh kaba kyrpang na bynta ki player kumjuh ruh ïa ka support staff halor kane ka jingjop ka jong ki.
“Ngi ai-khublei ïa ka kynhun ba ïakhun ha ka Ranji ba ki la ïohrung sha ka thup Elite Group bad ban ïakhun ha ka final na ka Plate Group. Ka long ka rai kaba jwat ban kynthup ïa ki player ba nabar,” la ong u President ka MCA- u Nababrata Bhattacharjee, hadien ba ka synjuk ka la rai ban nym kynthup ïa ki player ba nabar ha kane ka samoi. “Ha kaba khadduh, ka dei ka jinglen-lade bad ban shanñiah tylli ha ki player jong ka thaiñ bad mynta ki la wanrah jingkmen da kaba ïohrung sha ka Elite Group. U Kishan Lyngdoh, u kapten jong ngi, u la pynshohbiej ïa kiba bun da ka rukom lehkai ka jong u.”
Kumban shu pynkynmaw, ka la don ka jingïamynjur na ka Jylla bad ka kyrdan ïakhun elite level ka Ranji Trophy ha u snem 2021-22, hynrei katei ka samoi ka la shah pynthut noh ha ka khlam Covid-19 bad ka Meghalaya ka la ïoh ban ïalehkai tang lai sien ha katei ka snem. Shuwa katei, ym pat shym la don ka jingïakhun semi-final lane final ha ka Plate Group.
“Ka namjop mynta ïa ka Mizoram ka long kaba kordor ha ka history jingïalehkai kriket ka jylla, ha kaba ha ka sien ba nyngkong, ngin sa ïoh ban ïakhun ha ka final na ka thup plate group, bad ruh ban ïohrung sha ka Elite group jong ka Ranji Trophy ha ka samoi ban wan,” la ong u Honorary Secretary ka MCA- u Bah Gideon Kharkongor.
“Ngi sngewsarong ïa ka kynhun U-16 bad U-19 kiba la dep ban pynthikna ïalade sha ka Elite Group ha ka samoi ban wan, bad ngi kyrmen ba ka kynhun ha ka lympung U-23 Col CK Nayudu Trophy ban long kumjuh. Kane kan sa nang kyntiew ïa ka kriket hapoh ka jylla.” la bynrap u Bah Gideon Kharkongor.
Ka Meghalaya kan sa aireng pyrshah ïa ka Hyderabad ha ka final ka ban sdang naduh 17 tarik mynta u Rymphang.
