Jowai, Naiwieng, 26: Ka ophis jong ka Senior Dairy Officer, Jowai, kaba don ha Mooralong Jowai, mynta ka sngi jong ka 26 tarik u Naiwieng, ka la rakhe ïa ka sngi ‘National Mild Day’, ha ka jingïalang ba la pynlong ha phyllaw jong kane hi ka ophis.
Ha kane ka sngi ka kong DV Lyngdoh Assistant Deputy Commissioner West Jaiñtia Hills District, ka la long kum ka kongsan, ha ka jingïadonlang ka Dr N. Marbaniang District AH & Veterinary Officer, West Jaiñtia Hills District, ki nongri masi pynmih duh bad kiwei de.
La ïoh ka jingkren pdiang na ka kong M. Shylla, Senior Dairy Officer, West Jaiñtia Hills District. Ha kaba la pynkup burom ruh ïa ar ngut ki Progressive Dairy Farmer ne ki nongri masi pynmih dud ba khambun napoh kane ka District, kiba kynthup ïa u ma Robinus Saioo 42 snem, uba long ruh u Chairman jong ka Manroilang Multipurpose Cooperative Society Ltd ha ka shnong Mulieh. Kumjuh ruh ïa u ma Banteishaphrang Muskot 27 snem, uba long ruh u dkhot ka Banteilang Dairy farming Cooperative Society Ltd, ha shnong Mukroh West Jaiñtia Hills Districts.
Ka Dr Marbaniang, haba kren mynta ka ai ka jingpynshlur ïa ki nongri masi pynmih dud bad nangtrei shitom ban nangïai pynbun shuh shuh ka jingpynmih bad kyntu kum ki nongtrei ha kane ka kam ki long kiba kongsan ym tang na ka bynta lade hynrei ka long kum ka jingshakri ïa kiwei pat ki para briew. Ka la pynkynmaw ruh ïa kane ka sngi kaba long ka lyngkhuh sngi kha u Dr. Verghese Kurien ïa uba la tip kum u kpa jong ka White Revolution, kaba lyngba une u briew la tip bad ithuh ïa kane ka sngi.
Ka kong Lyngdoh, haba kren kum ka kongsan ka a ong ba ka jingrakhe ïa kum kane ka sngi ka long baroh ngi tip ba ka dud ka long kaba donkam ym tang ïa ki khunlung hynrei ïa kiba rangbah bad kiba la tymmen ruh. Na ka liang jong ka, ka la ai ruh ka jingïaroh ïa ki nongri masi pynmih dud napoh kane ka district bad ka kyntu ruh ïa ki, ba kin nangpynbun shuh shuh ka jingpynmih ïa ka dud khnang ba kane ka District kan long kaba lah ban pyndap ïa ka dud kat kum ka jingdonkam, shuh shuh na ka dud lah ruh ban pynmih shibun kiwei de ki jait jingbam kiba tei kum ka Yogurt, Makhon, Cheese bad kiwei de bad kane kan wanrah ka jingïohnong ïa ka district lada lah ban pynmih shibun ka dud, ka la ong.
Ha kane ka sngi la sam ruh ïa ki khusnam sha ki nongjop ha ka jingïakop Quiz bad Extempore Speech, ha ka jingïakop Quiz ïa ka kyrdan nyngkong la ïoh da ka Sursum Cerda Lakiang bad ka Olvia Kyndait na ka Government Girl Higher Secondary School, ba ar da ka Bandana Rai bad ka Sophia Dhar jong ka Kiang Nangbah Higher Secondary School, Jowai bad balai da ka Kynshew-Mame Siangshai bad u Vanlal Darnei jong ka Thomas Jones Higher Secondary School Jowai.
Ha ka jingïakop Extempore Speech pat ïa ka kyrdan ba nyngkong la ïoh rah da ka Fenia Sari na ka Dr. Norman Tunnel Hospital School of Nursing, ba ar da u Odawanlangki Sutnga na Kiang Government College, Jowai bad ba lai da ka Ngaitkimaya Sari na Shangpung College, Shangpung.
La pynphuh phynphieng shuh shuh ïa kane ka sngi da ki jingrwai bad jingtem kiba la shim bynta da ki nongtrei katei ka ophis bad ki jingrwai bad tem na u G. Plain.
