Nongstoiñ, Naiwieng 26: Ki nongïalam ka National Peoples Party Nongstoiñ Block mynta ka sngi hatmajai ka 26 tarik Naiwieng ki la pynlong ïa ka jingïalang ha MECOFED hall New Nongstoiñ na ka bynta ban ïatai sani kumno ban pynkhlaiñ shuh shuh ïa ka party.
Ha katei ka sngi la pynïaid ïa ka jingïalang da u bah Gabriel Wahlang MLA/MDC ba mynta ha ka jingïadon lang jong u bah Macmilan Byrsat MLA barim, u bah Hamletson Dohling Working president ka NPP Shillong city, u bah Himalaya Muktan Shangpliang, u bah Kimfa S.Marbañiang MLA barim ka Rambrai Jyrngam ki nongkitkam jong ka party, ki riew rangbah bad kiwei kiwei.
Nalor kata ha kane ka sngi ka party ka la pdiang burom ruh ïa ki nongkitkam jong kiwei pat ki seng saiñ pyrthei kiba dei na ka Congress, HSPDP, TMC bad kiwei kiwei kiba la wan ban pynïasoh sha ka NPP.
Hadien ba la dep ban pdiang burom ïa ki na ka liang ka NPP Nongstoiñ Block ka la pynithuh ruh ïa ki nongaplai tiket na ka bynta ka MDC Election ka ban sa long ha u snem ban wan. Hynrei haduh katei ka sngi don tang uwei u bah Dressara Marngar u ba dei na ka shnong Laitkseh u ba la dep phah ïa ka aplikeshon na ka bynta ban apllai tiket na ka NPP.
Ka jingïalang ka la pyrkhat sani ka ïing baroh kawei ka la mynjur ba na ka bynta ka MDC elekshon kin sa phah ïa ka kyrteng jong u sha ka District bad ka State Election Committee ba kan pynbna paitbah.
U bah Macmilan Byrsat u la ong ba ka jingwan pynïasoh jong u bah Gabriel Wahlang MLA ka Congress sha ka NPP kam don jingktah ei ei ha ki elekshon ban wan. Namar ba baroh ar ngut ki don ka jingïatreilang na ka bynta ban pynkhlaiñ shuh shuh ïa ka party.
Da ka jingdon jong u MLA ba mynta kum u president ha ryngkat ka jingtreilang jong u kum u MLA barim, kam don jingeh ei ei ruh em ba kin jop ha ka MDC elekshon.
U bah Himalaya M.Shangpliang u la ong ba lada ki nongïalam jong ka party ki trei shitom, na ka liang ka sorkar ka kloi ban phai khmat na ka bynta ki kam pynroi kiba bun ba ki paitbah ki donkam.
U la ong ruh ba ki jingkynthoh ïa ka NPP katba nang mih ki sngi ki nang bun, hynrei ki dak ki shin ki pyni ba ki paitbah pat ki la shoh jingieit, namar kat nang mih ki sngi kiba wan rung sha ka party ki nang bun ki bun.
U bah Hamlestson Dohling working president ka party u la ong ba ha kine ki snem ba ka NPP ka la ïalam ïa ka sorkar, ki paitbah ka jylla ki la ïoh shibun ki jingmyntoi lyngba ki kam pynroi bad ki jingïarap ha ki shnong ki thaw.
Ka sorkar ka la shimkhia ruh ban ïakren halor ki jingeh ba ki paitbah ki ïakynduh kum ka jingpynbeit ïa u pud u sam, ka jingpyrnung ïa ka ktien Khasi bad Garo ha ka Khyrnit kaba phra jong ka riti synshar ka ri, ka Inner Line Permit bad kiwei kiwei.
U la ong ruh ba halor kitei ki mat kiba don kam ka sorkar ka la pyrshang katba lah ban buddien na ka por sha ka por bad ban pynsngew sha ka sorkar pdeng ba kan pynurlong noh kham kloi la kitei ki mat jingdawa.
