Jowai, Nailur 08: Ka World Literacy Day, ka dei ka sngi kyrpang haka jingïadei bad ka thoh ka pule, kaba la sdang da ka UNESCO naduh u snem 1966. Ha une u snem ka UNESCO, ka la buh kyrpang ïa ka phang pdeng ka jong ka World Literacy Day kaba ong “Literacy for People, the Planet and Prosperity”, ka jingnang jingstad ïa baroh lang salonsar khlem da don kano kano ka jingsngew ïapher bad ban ïaleit ryngkat katkum ba long ka juk mynta, kynthup ïa ka rukum im ha ka imlang sahlang, ban tip ha ka ban kheiñ kor ïa ka Mei Mariang bad ki sawdong sawkun jong ka, kumjuh ruh ban kyntiew ïa ka roi ka par lyngba ki lad kamai kajih bapher bapher katkum ka juk mynta. Ha West Jaiñtia Hills District mynta ka sngi, lyngba ka ophis treikam jong ka District Mission Coordinator, Samagra Shiksha, ki skul kiba don ha ki Block bapher bapher jong ka District, ki la shim khia ban pynlong ïa ka programme kaba kyrpang na ka bynta ki khynnah skul da kaba pynlong ïa ka Drawing-Painting, Recitation, Slogan Writing, Poitri Writing bad kiwei de kiba long shi bynta ka dak ka jingïasnohkti lang bad ban pyni ruh ha khmat ka pyrthei ïa ka jingkordor jong kane ka sngi.
Shuh shuh na ka liang ki nonghikai, khnang ban khring ïa ki jingmut jingpyrkhat jong ki khynnah haka jingïadei bad ka jingkordor jong ka jingtip ban thoh bad ban pule ha kane ka juk kaba mynta, ki la shim bynta ban ai ki jingkren ba kyrpang halor ka thong jong ka World Literacy Day bad ban pynlong ruh ïa ka Literacy Pledge Reading.
