Nongstoiñ, Nailur 08: Ka Chief Minister’s Block Level Youth Engagement Programme (CMYEP) 2026, hapoh ka phang pdeng, ‘Young Meghalaya Shaping Tomorrow’, la sdang mynta ka sngi ha Market Complex Hall New Nongstoin, West Khasi Hills District.
Ka thong jong kane ka prokram ka long ban ai lad ïa ki samla ban ïashimbynta, ban ïoh jinghikai bad ban kyntiew ïa ki sap, ka jingpynwandur, ki jingnang jingstad bad ka jinglong nongïalam jong ki.
Ha kane ka sngi, la don lang ka kong Gracefulness Sten, Principal DIET Nongstoin, kum ka Kongsan. Ha ka jingkren jong ka, ka la pynpaw ba ka por samla ka long ka por kaba kongsan ha ka jingim, kaba dap da ka bor, ka jingpynwandur, ka jingangnud bad ka jingshlur ban shim ïa ki lad kiba thymmai. Ka la kyntu ïa ki samla ban pyndonkam hok ïa kane ka por da kaba kyntiew ïa ki sap, buh ïa ki thong bad ïeng skhem wat hapdeng ki jingeh.
Ha kaba ïadei bad ka phang pdeng ‘Young Meghalaya Shaping Tomorrow’, ka la pynshai shaphang lano, balei bad aiu ban pynwandur. Ka la ong ba ka por ban pynwandur ïa ka lawei ka long mynta, namar ka lawei kan long ka jingmih na ki rai bad ki kam kiba ngi leh ha ka sngi mynta.
Ka la pynkynmaw ruh ba ki samla ki dei ban pynwandur ym tang ïa ka lawei jong ki hi, hynrei ïa ka jinglong, ka jingnang jingstad, ki sap bad ka imlang sahlang, khnang ba kin long ki nongïalam ban ïalam ïa ka Jylla Meghalaya shisien ka sngi.
Katba ha ka jingkren pdiang, ka District Sports Officer, West Khasi Hills, Kong Balarina Syiem, ka la pynpaw ïa ka jingdonkam ban ai ïa ki samla ïa ki lad ban pyni bad pynroi ïa ki sap jong ki.
Ha kane ka prokram la don lang ruh u Dr. Maxwell Lyngdoh, Counsellor bad Career Expert, Shillong, u ba la ai jingmut bad jinghikai sha ki samla halor ki lad ïadei bad ka pule puthi bad ka kamai kajih.
La pynlong ruh ïa ki jingïakop bapher bapher, kynthup ïa ka jingïakop Guitar bad Flute, shad, rwai folk song bad kiwei kiwei ki jingïaleh tynrai bad jingïaleh pyni sap, ban ai lad ïa ki samla ban pyni ïa ki sap jong ki.
Kane ka prokram ka thmu ban pynkhlaiñ ïa ka jingïashimbynta jong ki samla bad ban pynshlur ïa ki ban long ki nongpynwandur ïa ka lawei jong ki hi bad ban noh synñiang sha ka Meghalaya kaba kham skhem, kham kiew bad kham roi.
