Rakhe ka ophis DMHP bad DLSA ïa ka sngi pyrshah bad jingkhaïi be-aiñ ïa u drok

Mawkyrwat, Jylliew, 28: Ka ophis jong u District Mental Health Programme, South West Khasi Hills District kaba hap hapoh jong ka ophis treika jong ka District Medical & Health Officer, South West Khasi Hills District ha ryngkat ka jingïatreilang bad ka ophis jong ka District Legal Service Authority (DLSA), South West Khasi Hills District ka la ïoh ban rakhe ïa ka sngi pyrshah ïa u drok bad ka jingkhaïi ïa u ne ka ‘International Day against Drug Abuse and Illicit Trafficking’ ba la rakhe hapoh jong ka Indoor Hall jong ka Shnong Mawlangwir.
Ïa kane ka jingrakhe la rakhe kaba dei halor ka phang, “People First: Stop Stigma and Discrimination, Strengthen Prevention” ha kaba ïa ka jingïalang la pynïaid da ka kong Nydia Marbaniang, Monitoring and Evaluation Officer jong ka ophis District Mental Health Programme, South West Khasi Hills District.
Ka jingthmu ba kongsan jong kane ka prokram ka long ban pynshai paidbah halor ka jingdonkam ban sumar, peit bniah ïa ki briew kiba la ngop ha u drok da kaba burom bad jingsngewlem ne jingsngewthuh ïa ka jingsngew ne jingshem jong ki.
Ki nongkren ha kane ka sngi ki long ka kong S.M. Wanniang, MJS, Judicial Magistrate First Class, South West Khasi Hills District, u bah S. Syiemlieh na ka Life Care Foundation, ka kong W. Lyngkhoi, Adolescence Counsellor bad na ka kong B. Snaitang, Psychiatric Nurse, District Mental Health Programme, South West Khasi Hills District.
Ka kong S.M. Wanniang, MJS, Judicial Magistrate First Class, South West Khasi Hills District haba kren ha ka jingïalang ka la batai halor ka jingtreikam jong ka District Legal Services Authority (DLSA), South West Khasi Hills District bad kaba la batai ruh halor ka NDPS Act 1985. Ka la ban bniah ruh halor ka Section 40 kaba kren halor ka bor jong ka aiñ ban pynlait ïa ki kyrteng bad jaka jong ka jingkhaïi pateng bad bun ki jingeh ba pyrshah ïa ka aiñ.
Ka kong Wanniang ka la pynshai ruh halor ki jingpynsajia ne pynshitom ïa ki nongkhaïi beaiñ ïa u drok bad ka shong halor ka jingbun ne jingkhia jong u drok. Shuh shuh ka la ong ruh ba ka don ruh ka jingpyrkhing na ka ban rep ne thung ïa ki jait kynja ba long drok.
Na ka bynta kito kiba la ngop ha u drok, ka la ong ba ki lad jingïarap na ka bynta jong ki. Ka la ong ruh ba ngi donkam bun ki jingpynshai paidbah khamtam ha ki skul pule, ki ïing ki sem, ki nongshah set phatok bad ruh ban pynsngewthuh ïa ki nongrep.
U bah S. Syiemlieh na ka Life Care Foundation, u la kren halor ka jingthmu bad ka jingtreikam jong ka Life Care Foundation da kaba u kyrpad ruh ïa ki nongïashimbynta ha kane ka prokram ban ai jingpynshai lang sha kiwei pat halor ka jingdon jong kane ka ophis treikam bad ki lad jingïarap kiba don lypa ha ka. U la pynshai shuh shuh ba ha kane ka ophis treikam ki ju ai ruh ki jingïasyllok na ka bynta kito ki briew kiba la ngop ha u drok bad ïarap ruh ban pynïoh ha ki ki lad jingsumar.
Ka kong W. Lyngkhoi, Adolescence Counsellor pat ka la kren halor ka Adolescence Health Clinic ban ïa ka jingïasyllok ïa ki khynnah kiba dang hap ha ka Adolescence Age Group kata 10 haduh 19 snem karta. Ha ka jingkren jong ka ka la kyrpad ruh ïa ki paidbah ban pynsaphriang lang ïa kane sha kiwei khnang ba kin phah ïa ki khun ne ki para Marjan kiba donkam ki lad jingïarap lyngba ki jingïasyllok.
Ka la ïathuh ruh ba ka don ka Counselling ne ka jingpynsngewthuh ïa ki kmie ki kpa kkumno ba kin peit thuh bha ïa ki khun khamtam ha kane ka ka por ba ki dang khie-san namar ka ktah bha ïa ka jingmut jingpyrkhat jong ki.
Ka kong B. Snaitang, Psychiatric Nurse, District Mental Health Programme, South West Khasi Hills District ka la kren halor ki jait drok bad ki jingktah bapher bapher kiba mih na u drok lada u ne ka briew ki pyndonkam. Ka la pynshai ruh halor ka jingktah jong u ïa ka koit ka khiah bad ha ka jingmut jingpyrkhat.
Ha ka jingkren jong ka ka la pynshai ruh halor ka COTPA Act kaba dei shaphang kumno ba la khang na kaba pyni ïa ki kynja advertisement kiba dei shaphang u duma, u cigarette, kyiad bad kiwei de ki jaid jingdih ba sniew. Shuh shuh ka la ong ruh ba ïa u duma ne cigarette kim lah ban die hajan ki skul ne jaka pule hynrei ki jaka die ki dei ban jngai la kumno kumno 10 km na ki jaka pule.