Pdiang ka Nongjri TWA ïa ka jingpynïaid da u Serial Number ha ka jingkit Coke

Mawkyrwat, Ïaïong 20 : Ka Nongjri Trade Welfare Association (TWA), kaba dei ka kynhun jong ki trai shnong trai jaka jong ka thaiñ Nongjri, ka la pynlong ïa ka jingïalang paidbah (General Meeting) ha ka 20 tarik u Ïaïong 2026 ha Nongjri ban ïakren halor ka jingmih ki kynrum kynrum bad jingïapher jingmut hapdeng ki artylli ki kynhun, kata ka Meghalaya Commercial Truck Owners Driver Association (MCTODA) bad ka South West Khasi Hills Truck Owners Driver Association (SWKHTODA).
Kane ka jingïapher jingmut ka la wanrah ruh ïa ka jingpakhang ne jingsangeh kamai ïa ki kali kit coke na ka thaiñ Nongjri la kumba shi bnai.
Haba kren sha ki lad pathai khubor, u President ka Nongjri TWA, u bah Mandilos Nongbri, u la pyntip ba hadien ka jingïalang, ka seng ka la shim ïa ka rai da kawei ka jingmut ban pdiang ïa ka jingpynïaid da u serial number ha kaba ïadei bad ka jingkit ïa u coke.
Kumta, ka Association ka khot bad wer ïa kine ki artylli ki kynhun ba kin wan jingïasuk noh bad ban aiti noh ïa ki registration jong ki kali jong ki, khnang ba yn lah ban pynbeit bad pynïaid ryntih da ka rukom serial number ha kine ki sngi ban wan.
Shuh shuh, u bah Mandilos Nongbri u la kdew ruh ba lada don kino kino kiba pynkheiñ ïa kane ka rukom pynïaid kumba la ïohi ha ki por ba la dep, ka jingkitkhlieh kan hap ha u trai kali, u nongniah bad ruh ha ki trai factory.