Ngi la kyrmen ban long aiñ ka 33%, hynrei shah pynhap noh pynban ka pliangja ki kynthei: BJP MM

Shillong, Iaiong 20: Ka Kong Arena Hynñiewta State President BJP Mahila Morcha (MM), Meghalaya ka la pynpaw ïa ka jingpynrem kaba jur halor ka jingshah pynrem noh ka jingthmu ban wanrah ka jingai bhah kaba 33% ïa ki longkmie ba kin ïohlad ban ïakhun ïa ki elekshon sha Parliament bad sha kiwei pat ki elekshon hapoh ka ri.
Haba kren sha ki lad pathai khubor ha ka sngi Nyngkong, ka Kong Hynñiewta ka la ong ba ka BJP hapoh ka jingïalam jong u Myntri Rangbahduh ka ri u Narendra Modi u la don ka jingangnud ban wanrah ïa kane ka bhah kaba kyrpang na ka bynta ki longkmie ban long ki nongïalam, ki nongmihkhmat hapoh ka jylla bad kumjuh ruh hapoh ka ri baroh kawei.
“Ngi pynrem jur ïa ki seng kiba don ha ka liang pyrshah kum ka seng Congress, ka DMK bad kiwei kiwei ki seng kiba don ha ka liang pyrshah kiba la pynhab noh ïa ka pliang ja jong ki kynthei bad nga pynrem jur ruh ïa ka nongïalam ka seng Congress ka Priyanka Gandhi kaba kum ka nongmihkhmat kaba dei ka kynthei hynrei kam shym la kyrshan ïa kane ka bill bad haba phai sha ka jylla Meghalaya ïa ngi ki kynthei la burom bad ai ka bor kaba kyrpang, la ka dei ha ka kur ka jait bad kiwei kiwei ki bhah khamtam ïa ki khun ki kti la ithuh na ka kmie, kumta kane ka jingpyrshah da ki liang pyrshah ka la pynduh mynsiem ïa ngi ki longkmie,” ong ka Kong Hynñiewta.
Ka la ong ba ka la don ka jingkyrmen ba da kaba pynlong aiñ ïa kane ka bhah kaba 33% ïa ki longkmie kan ai lad shuh shuh ïa ki kynthei na ka jylla Meghalaya ba kin mih shakhmat ban trei ha ka imlang sahlang bad ha ka ri baroh kawei na ka bynta ka bha ka miat jong ki nongshong shnong.