Nongstoiñ, Jylliew, 28: Ka Khasi Students Union (KSU) Mairang Circle ka la kem ïa ar ngut ki bar Jylla kiba wan die tiar da ka kali ha kylleng ki jaka ka Mairang khlem da don ïa ki kot ki sla kiba biang.
Ïa kine ki bar Jylla la kem da ka seng ha ka jingïalam jong u Education Secretary samla Robin N Nongrem bad u General Secretary ka Pyndengumiong Unit Kharjutang K Syntiew hynne ka janmiet. Kine ki bar Jylla ki la wan da kawei ka Maruti Alto ka bym don satia wat ïa u registration nombor.
Haba tohkit, ka seng ka la lap ba kine ki briew ki dei kiba wan na Uttar Pradesh bad uwei na ki, u don tang da ka adhaar card bad uwei pat u don tang ka ILP ba rung sha Manipur kaba la kut noh naduh ka 14 tarik Lber, 2023. Kine ki ar ngut ki kyrteng u Mohd Shariq bad u Nizam Khan.
Kine ki bar jylla ki la thok ruh ba ki sah ha Shillong bad kam ba ki la ïoh rung sha ki shnong ki thaw lyngba ka jingïarap jong ki katto katne ngut ki Khasi.
Ka Seng ka kyntu jur ïa ki nongïalam shnong ba kin peitngor ïa kum kine ki briew ki bym lah pynthikna ki dei ki ei, kiba la wan rung laitlan sha ki shnong ki thaw.
Ha kajuh ka por, ka la kyntu ïa ki paradoh para snam ba kin kiar ha ka ban ai jaka rieh ïa ki briew kiba nabar ka Jylla, khnang ba ka imlang sahlang kan lah ban teh lakam ïa ki jingsniew kiba ju jïa na ka por sha ka por.
