Hiar jurip u MLA ïa ki jaka ban shna surok ban pynkhreh ïa ki ar tylli ki Jingïaseng heh ha shnong Rangmaw

Mawkyrwat, Ïaïong 15 : U MLA jong ka Mawkyrwat Constituency, u bah Renikton Lyngdoh Tongkhar ha ryngkat ka jingsynranlang u bah B. Shylla, Sub Divisional Officer (SDO) ka PWD (Roads), Mawkyrwat Division, ha ka 14 tarik u Ïaïong, 2026 ki la hiar jurip ïa ki katto katne ki jaka ban shna surok kum ka jingdak jong ka jingpynkhreh ïa ki ar tylli ki jingïaseng heh ha Shnong Rangmaw.
Lah ban kdew ba ki ar tylli ki Jingïaseng ki kynthup ïa ka Jingïaseng Samla jong ka KJP Synod Sepngi ha ka Balang Presbyterian Rangmaw bad ka Jingïaseng jong ki Samla ka Youth Assembly Meghalaya & Assam ha ka Balang Church of God Rangmaw bad kine ki jingïaseng kin sa long ha u snem 2028.
Ha kane ka jingleit jurip, u bah Renikton Lyngdoh Tongkhar haba kren ha ki lad pathai khubor ula pynpaw ba lyngba kane ka jingjurip ka long ban peit ïa ka jingdonkam kum ka jingpynbit pynbiang ïa ki lynti syngkien bad ki surok khnang ban pynsuk ïa ka leit ka wan jong ki paidbah nongwan jingïaseng, bad ban pynthikna ruh ba kan nym don kano kano ka jingthut ha ka jingïaid jingïeng bad jingïaid jong ki kali.
U la ong ruh ba ka jingjurip ha kane ka sngi ka kynthup ban shna ïa ka surok kaba don ka jingjngai kumba 3 – kilometer tam ei ei ban poi sha ka jaka pynlong jingïaseng, ha kaba la thmu ban shna bad pynbha noh khnang ban pynbiang ïa ka jingïaid lynti ha ka por jingïaseng.
Nalor kata, la jurip bad mait phang ruh ban shna ïa ka surok na Rangmaw sha Jingkieng Wah Umngi kaba jngai kumba 6 – kilometer ei ei, kaba long ruh ka bynta kaba kongsan ban pynsuk ïa ka leit ka wan jong ki paidbah.
“Halor kine ki ar tylli ki mat jingdonkam, ngan sa rah sha ki bor sorkar ba dei peit khnang ba kin ïoh ban mang pisa kyrpad bad ba ki jingpynkhreh baroh ki ïoh long kiba ïaid beit ïaid ryntih shwa ka por ne ka snem long jingïaseng”, ong u bah Renikton Lyngdoh Tongkhar.