Shillong, Ïaïong 07: Ka seng Bharatiya Janata Party (BJP) ka la rakhe ïa ka jingdap 46 snem ka jong ka da kaba pynlong ïa ki prokram ki bapher ha kylleng ka jylla Meghalaya baroh kawei.
Ha kaba ïadei bad kane ka prokram na ka liang ki nongïalam jong ka seng ki la pynher ïa ka lama jong ka BJP bad ki la kynmaw burom ïa ki nongïalam kiba radbah jong kane ka seng kiba kynthup ïa u Atal Bihari Vajpayee, u L.K. Advani bad u Murli Manohar, kiba dei ki nongïalam kiba la don ïa la ka jingïohi jngai, ban kyntiew, ban pynïatylli bad ban pynlong ïa ka ri kaba khlaiñ kaba la lam ruh ia ki sha ka lynti ban thaw ïa kane ka seng saiñ pyrthei kaba la wanrah ïa ka jingkylla ha ka synshar khaddar hapoh ka ri India.
Ka rukom ai jingshakri kaba la ïaid ha kata ka rukom ha kaba la sei ïa ki nongïalam na ki shnong ki thaw bad la saiñdur bad pynkupbor ïa ki, da ka seng BJP, ha ka jaka jong ka jingpynhiar pateng ïa ka rukom synshar khaddar na ka longïing kaba dei kaba ju jia bha ha ka kam saiñ pyrthei hapoh ka ri India.
Ha ka kyrwoh khubor la pynpaw ruh ba ka jinglong politishan ki riew paidbah ka la wanrah ruh ïa ka jingkylla da kaba wanrah ïa ki skhim kiba la kyntiew ïa ka jingim jong ki paidbah ka ri.
Da ka jingmut jong ka jingïakhih la pynwandur ïa ka seng ha ka 6 tarik u Ïaïong 1980 bad ka la ai sha ka ri ïa ki ar ngut ki Myntri Rangbah duh kiba tbit kiba kynthup ïa u Atal Bihari Vajpayee bad u Narendra Modi.
Ka ophis treikam jong ka BJP Meghalaya ka la pynlong ïa kane ka jingrakhe, ha kaba u President ka seng u Rikman G Momin ula pynher ïa ka lama ka seng bad u General Secretary u Wankitbok Pohshna bad kiwei kiwei ki nongïalam kiba la wan ïashimbynta lang.
Na ka liang ka BJP Meghalaya ka la pynhreh ruh ïa ki prokram ki ban ïaid baroh shi taïew ka ban kynthup ïa ka jingpynkhuid shnong, ka jingnoh synniang ïa ka snam bad kiwei kiwei bad yn pynkut pat ha ka 14 tarik u Ïaïong kaba dei ka lyngkhuh sngikha jong u B.R. Ambedkar.
