Shillong, Risaw 28 : Ka Sorkar Jylla ka la rai ban kyntiew kyrdan noh ïa ki palat 2000 tylli ki anganwadi centre sha ki early child development (ECD) centre kiba don ha ka jylla.
Ïa kane la pyntip da u Principal Secretary ka tnad ka Koit ka Khiah ka Jylla, u Sampath Kumar haba kren bad ki lad pathai khubor hadien ka jingïalang jong ka tnad.
“Ha ki arsnem ban wan ngin sa kyntiew kyrdan shuh palat 2000 tylli ki Anganwadi Centre sha ka kyrdan Early Child Development Centre,” u la ong.
U ong ruh ba ka Meghalaya ka dei ka jylla kaba nyngkong eh ban sdang ïa ka mission na ka bynta ka bit ka biang jong ki heprit.
U Principal Secretary u ïathuh ruh ba kane ka ECD Cenre ka kynthup ïa ki kyrdan bapher bapher ha ka rukom treikam la ka long ha ka koit ka khiah, ka imlang sahlang, ka pule puthi bad ruh ka jingïadei ha ka roi ka par ha ki nongkyndong.
“Kumta, ki don shibun ki kam ha ka ECD khamtam eh kumno ban pynbiang ïa ki khynnah, ki longkmie armet, ki longkmie lungkhun, haba ïadei bad ka jingpynbiang ïa ki bam kiba tei,” u la ong.
U ong ruh ba ka tnad kan treilang bad ka IIT, Bombay na ka bynta ban ai jinghikai ïa ki longkmie halor ka jingkordor ka rukom ai buiñ kmie ba ai ka jingbam kaba tei ïa ki khunlung.
Katkum ka jingong jong u, kane ka sienjam ba kyntiew kyrdan ïa ki Anganwadi Centre ka long ban pynbiang ïa ki jaka ai jinghikai ïa ki khynnah haba ki leit sha kine ki centre.
U ong ruh ba ïa kitei ki centre yn sa shna da ka jingtrei lang bad ka tnad C&RD khamtam lyngba ka NREGS ryngkat ka jingkyrshan lang na ka ADB.
