Shillong, Risaw 28 : Na bynta kito kiba ju leit kai sha ki thaiñ Sohra lada ïathuh khana shaphang u riewhadem ba shu thang baroh kin kynmaw beit shaphang u riewhadem ba ju die ha Jingkieng Duwansing Syiem ba ju tip ruh kum ka jingkieng Mawkdok.
Ryngkat ki shawla bad shi khung u riewhadem bad u rnga da ki phew ngut ki longkmie man ka step ki leit sha katei ka jaka jngohkai ban pynbiang lypa ïa ki riewhadem ha shwa ban poi ki nongwan kai.
Kine ki longkmie haba kren bad ki lad pathai khubor ki ïathuh, “Man ka sngi kampher la dei ka por Tlang ne por Lyiur ruh ngi poi beit shane ban wan die ïa kine ki riewhadem thang. Da kaba ngi die ïa kine ki riewhadem kumne man ka sngi ngi lah pat ban pyndap lang ïa ki jingdonkam kiba bun ha iing,”ong iwei na ki longkmie.
Watla u riewhadem u mih tang shisien ha ka shisnem ha ka jylla hynrei ki ïathuh pat ba ki don ki briew na Shillong kiba pynbiang ïa u riewhadem baroh shisnem ba kin ïoh die wat ha kito ki bnai bym pat mih riewhadem ruh watla ka dor ka la kham rem.
Tangba watla ki don ïa dur ba phuh samrkhie hynrei ha lyndet pat ki don ïa ka khubor kaba sngewsynei kaba ki hap ban mad man ka por khamtam haba poi ka aiom slap.
“Ngi rit mynsiem eh tang shu poi ka por slap,” ki la ong da kaba bynrap ba ha ka por ba u ther jam lei ki shu khuslai beit.
“Kumta lada long kaba lah ngi kyrpad rit ïa ka sorkar ban pynshna noh da ki kynja iing khnang ba ha ka por lyiur ne por tlang ngin lah ban bteng ïa ine i kamai jongngi khlem jingrit mynsiem,” ki la ong. Shuh shuh ki ong ruh ba lada ki ïoh ïa kitei ki iing ki lah ban buh ïa ki riewhadem, ki rnga, shawla bad kiwei kiwei ki tïar kiba ki ju pyndonkam man ka sngi.
Da kaba ïathuh ba watla ki ïoh kamai tang khyndiat eh ha ka shisngi hynrei ki hun pat ba ki lah ban ieng ha la ki jong ki kjat da kaba die ïa kitei ki riewhadem.
“Ngi la lah pat ban kyrshan lang ïa ki jingdonkam ha iing ha sem bad ruh ban pyndap lang ïa ki jingdonkam ki khun ha skul,” ong iwei na kitei kiba die riewhadem.
Ha kajuh ka por ki pynpaw ruh ka jingsngewkmen ïa ka jingailad ki bor shnong bad ki bor sorkar ba kin die jingdie ha katei ka jaka kaba ki nongjngohkai na kylleng ki poi ban peitkai ïa ka jingitynnad katei ka thaiñ khamtam naduh Jingkieng Mawkdok ter ter shaduh Sohra.
