Rai ka RAFA bad ki nongrep ban pynïap ïa ki Hati khlaw ba shim sting ka Wild Life bad DC

Mawkyrwat, K’lyngkot, 21: Ka Ranikor Area Farmers Association (FARA) ryngkat bad ki nongrep na ka shnong Nongnah, Nongïohijngai, Dirang, Mawlangbah, Shnong 18 Mile bad kiwei de ki shnong bamarjan ha ka jingïalang paidbah kaba la long ha ka sngi saitjaiñ ha ka shnong Photkroh bad ha ka shnong Nongnah, South West Khasi Hills District ki la shim ïa ka rai ban thwet bad ban pynïap shisyndon ïa ki hati khlaw kiba ju wan ban pynjulor ïa ki mar rep bad kiba ju kthong ïa ki briew haba ki thmu ban leit rep sha ki Bri ki Bsah.
Ki nongrep ki pynpaw ba ka jingthombor jong ki hati khlaw ka pynlong ïa ki nongrep haduh ba kim nud shuh wat tang ban leit kheit ïa ki marrep ba ki ladep thung bad khamtam ha kine ki sngi ba ka la dei ka por ban lum ban lang ïa u synsar, u kwai, u sohmarit, u tympew, ki kait, u sla tyrpad, u phan dieng. Ki ong ruh ruh ba ki hati khlaw ki la don ha kine ki thaiñ la kumba ar snem ei ei. Hynrei kaba pynsngewsih ïa ki nongrep ka long ba wat tang ban leit peit ïa ki marrep jong ki kim nud shuh naba kine ki hati khlaw ki kthong kylla ïa ki briew lada ki mut ban leit.
Ha ka jingïalang, u Secretary jong ka Ranikor Area Farmers Association (RAFA) Bah Kyrmen K. Ryja u la pynkynmaw ba kum ka seng ryngkat ki nongrep ki ladep ban ujor ha ki bor sorkar, kata, sha ka tnad Wildlife bad sha u Deputy Commissioner jong ka South West Khasi Hills District hynrei haduh mynta ki kular ban shimkhia tang da ka ktien katba ka kam pat kim leh eiei.
Ki nongrep ryngkat bad ka Association ki la rai mynta ban leit pynïap noh shi syndon ïa kine ki mrad kiba pyndik bad kiba la pynjulor ïa ki mar rep jong ki ha kaba ka rai ba khatduh ha kane ka sngi lada ki paitbah ki la ïa mynjur da kaba rah kti ba kumba kine ki Hati ki la pyntieng pynsmiej da kaba pynjot ruh ïa ki mar rep kim banse ban thom wat ïa ka sang ban kput ban leit pynïap noh ïa kine ki hati khlaw kiba don ha kine ki jaka rep.
U la ong shuh shuh ba ha u snem 2023 ka la long shaba palat bad la bunsien ruh ki la ju leit ban ïakynduh ïa ki bor ba dei peit ba ki dei ban leh eiei halor kane ka bynta hynrei kaba sngewsih ka long ba kane ka jingleit pynsngew kam shym la urlong satia kumba ki la kular.
Ka Ranikor Area Farmers Association (RAFA) ka la shim ruh ïa ka rai ba khatduh la ka long ha kano ka bynta kin leh ïa ki hati khlaw kiba la wan ban pynjot ïa ki mar rep jong ki.
U la ong ruh ba ha kiwei pat ki jaka la ju ïohi ba ki bor ba dei peit jong ka tnad Wild Life ki don ka jingkhang pyrshah ban pynïap ïa ki mrad khlaw bad ka don ruh ki aiñ kiba khlaiñ bha kumno ban ïada ïa ki mrad khlaw hynrei lada kine ki mrad khlaw ki pynjot ïa ki mar rep pat kum ki nongrep kim shym la ïohi ïa ki dak ki shin ba ki wan ai ki lad jingïarap kumba ka la jia ha kine ki thaiñ jong ka Nongnah.
Ki nongïalam jong ka RAFA ki la ong, “ngi la nujor bad ki nongtrei kam Sorkar kim lah mo ban leit sha ki lum ban rep kumba leh ki nongrep kiba ju im kyndoi ja kpoh ha ka kam rep kam riang ba ki dei ban shimkhia ïa ka kam. Wat ka jingim briew ruh haduh mynta na ka liang ka Sorkar kam shym lah ban ai ki lad jingïarap na ka bynta jong ki nongrep kumta ka rai na kane ka jingïalang ka long ba ngin ym shah shuh ïa ka jingwan pynjot jong kita ki mrad khlaw namar ym banse ba lada ki bor Sorkar ki phah kem ruh ngin ym salia namar kum ki nongrep ki la ïa kynduh bun bah ki jingeh ba wat tang ban leit rep ruh ngim nud shuh bad daei pat ngin bam bad hato kata ka Sorkar ka lah mo ban ai ïa kita ki lad jingïarap ne ai tulop ïa ki nongrep ba ma ki kin shu shong ïing noh.”
“Hato lada ngim lah shuh ban rep ngi lah mo ban im? la buh jingkylli ka RAFA.
Kiwei pat kiba la ai jingkren ha kane ka sngi ki long u President ka RAFA Bah Micheal Lyngdoh, u Apualus D. Sangma bad u Bah Romoland Paliar ryngkat ka jingsakhi lang jong ki paid nongrep ka thaiñ Nongnah baroh kawei bad ka thaiñ Photkroh.