Nongstoiñ, K’lyngkot 21: Ka Bharat Sanchar Nigam Limited ka dei ka Kompeni telephone, kaba la sdang nyngkong eh ban ai ka jingshakri ïa ki paitbah, da kaba pynïeng ïa ki tower ha man la ki jaka. Hynrei, ha kine ki sngi uwei u tower u ba katei ka Kompeni ka la pynïeng ha ka shnong Sangriang, um shym la trei kam shuh la shi bnai kynthih.
U bah Overshiland Sangriang sordar jong ka shnong Sangriang haba pyntip ha u nongthoh khubor mynta ka sngi, u la ong ba ka jingbym treikam shuh jong utei u tower ka la pynduh nong haduh katta katta ïa ki paitbah kiba pyndonkam mobile phone da katei ka Kompeni, kaba ka la ktah ïa ki paitbah jong palat arphew wei tylli ki shnong kiba pyndonkam mobile phone kiba treikam lyngba utei u tower.
U bah Sangriang u la ong ruh ba ka jingduh nong jong ki paitbah ka long namar ba ha katei ka thaiñ, kiwei kiwei ki Kompeni Mobile kim pat da treikam bha. Kumta, ki paitbah ki hap ban pyndonkam da ka BSNL bad haba ki don ki kam ba kyrkieh, kum haba don kiba shitom jur kiba hap ban pyntip sha ki kali 108, ki paitbah ki shem jingeh bha namar ym don network. Kumta ki hap ban shim wai da ki kali shim ban pynpoi ha ki jaka sumar bad lada dei ba ka jingshitom ka la jur palat lei lei ka shem jingeh bha.
Nalor kata u la ong ba ki paitbah jong katei ka thaiñ ryngkat ki paitbah shnong Sangriang, ki la dawa ba lada utei u tower u la sniew ruh, ka BSNL ka dei ban wan maramot noh kloi. Namar lada kim wan ban maramot ruh, ka BSNL ka dei ban pynthikna la kan dang pyntrei kam ne kam pyntreikam shuh, khnang ba ki paitbah kin tip bad kin leh ïa kaba donkam.
U la ong ruh ba lada ka Ophis jong ka BSNL kaba don ha Ladweitang ka don ki nongtrei, ka la dei ban phah ba kin wan maramot bad lada katei ka ophis kam don nongtrei shuh ruh, ka dei ban da pynthikna khnang ba ki paitbah kin tip. Lada kam treh shuh ban pyntreikam ruh ki paitbah kin pynkhyllem noh bad die nar jot ïa ki tiar ki tar bad ki nar kiba pynïeng ïa utei u tower.
