Shillong, K’Lyngkot, 21: Kum shibynta ka jingrakhe ïaka lyngkhuh dap 52 snem ka jingïoh jong ka Meghalaya la ka jong ka jylla, u Lat ka Jylla, u Phagu Chauhan hynne ka sngi u la plie paidbah ïa ki Mawbynna ba pynieng shabar ka khyrdop jong ka Raj Bhavan Shillong kaba long ruh kum shi bynta ka jingrakhe ïa ka jingdap 150 snem jong ka Raj Bhavan.
Ha kane kajuh ka sngi, u Lat u la plie paidbah ruh ïa ka iing hajrong dieng ïa kaba la shna ha phyllaw jong ka Raj Bhavan kaba la pynitynnad shuh shuh ïa katei ka jaka.
La donlang ha kane k asngi naduh ki ophisar bad ki nongtrei jong ka Raj Bhavan hapoh ka jingïalam jong u Commissioner & Secretary jong u Lat, u Dr. BDR Tiwari.
Lah ban kdew hangne ba ka Raj Bhavan kadei kawei na ki iing kiba nyngkong eh ban tei ha Shillong. Ka la dei ruh ka jaka sah jong u Deputy Commissioner, ha kito kip or u Colonel Henry Stuart Bivar. La shna bad pynwandur ïa ka ha kata ka rukom ban pyni ïa ka jingsynshar jong ki dohlieh ha katei ka por.
La ong ba dei ha u snem 1874, haba ka Shillong ka la long ka nongbah jong ka Province ba thymmai jong ka Assam, ïa ka Bivar House la pynkylla noh sha ka jaka sah jong u Chief Commissioner (Chief Commissioner’s Residency).
Hynrei ka Residency, ka la shah pynjulor noh khlem lah shuh ban maramot ha u jumai bah ha kato ka por ha u snem 1897. Kumta ïa katei ka jingtei ba mynta la shna biang ha katei ka Residency bad shimti ha u snem 1903-04.
Kumta hadien kane ka sorkar ka la jer kyrteng noh ïa ka kum ka Raj Bhavan ha ka 06tarik Nohprah, 1951.
Hadien ba ka India ka la ïoh ïa ka jingsynshar laitluid, katei ka jaka ka la kylla long noh ka jaka sah jong u Lat ka Jylla haduh mynta mynne.
