Shillong, K’lyngkot, 21: Ka United Democratic Party ha ka sngi Baar mynta ka taiew kan sa pynithuh paidbah ïa u Bah Robert June Kharjahrin kum u kyrtong jong ka Regional Democratic Party (RDA) u ban aireng na Shillong Seat ha ka elekshon Lok Sabha ka ban sa long shen.
Ha kane kajuh ka sngi, ka party kan pynbna paidbah ruh ïa ka jingsdang ïa ka jingïalap ïawer sha ki paidbah na ka bynta ban pan jingkyrshan ïa u Bah Kharjahrin ha kane ka elekshon.
Katkum u kyrwoh ba la phah sha ki nongkyrshan jong ka party, ka UDP ka la pyntip ba ka jingïalang ban pynithuh ïa u Bah Kharjahrin kan sa long ha ophis treikam jong ka seng ha Bomfile Road, Laitumkhrah, Shillong ha ka por 11:00 baje mynstep.
U Asst. Secretary ka RDA Bah Titostarwell Chyne ha u kyrwoh u la pyntip ba ka RDA ka khot sngewbha ïa baroh ki MLA bad MDC jong ka UDP bad HSPDP bad baroh ki dkhot jong ka Seng Kmie, President bad Secretary jong ki District, ki Circle/Constituency, ïa ki nongialam jong ka UDP bad HSPDP, ki dkhot ka Women’s bad Youth Wing.
Kum ban shu pyntip hangne, ba ka UDP bad ka HSPDP dang shen ki la pynthymmai ïa ka jingïatreilang bad mynjur ruh ban pynieng ïa u President barim ka Hynñiewtrep Youths Council (HYC) Bah Robert June Kharjahrin kum u kyrtong jong ka RDA ha ka elekshon Lok Sabha.
Ki seng saiñpyrthei kiba la sei madan ïa ki kyrtong ban pynïakhun ha ka elekshon Lok Sabha na Shillong Seat ki long ka NPP kaba lamkhmat ïa ka Sorkar MDA kaba la pynieng ïa ka Dr. Mazel Ampareen Lyngdoh kaba dei ka MLA ka East Shillong Constituency bad Myntri ka Sorkar Jylla, ka RDA (UDP-HSPDP) kiba ïatreilang bad ka Sorkar MDA ba la pynieng ïa u Bah Robert June Kharjahrin, ka Voice of the People Party (VPP) kaba la pynieng ïa u Dr. Ricky J. Syngkon.
Na Tura Seat, tang ka NPP kaba ladep pynbna ban pynïakhun da ka Sitting MP ka Agatha K. Sangma.
Haduh mynta ka Congress kam pat pynbna satia ka kyrteng jong u/ka kyrtong watla u Bah Vincent H. Pala uba dei u MP ba mynta jong ka seng Congress u dei uba mihkhmat ïa ka Shillong Seat.
Ka BJP ka dang kheiñ jingkheiñ bad kam pat lah satia ban shim rai. Dang shen u National Vice President ka BJP u Dr. M. Chuba Au ha ka jingwan iuhkjat sha nongbah Shillong u la pyntip ba ka party kan dang trei shitom shwa ban sei kyrtong na Shillong bad na Tura Seat.
