La khot sngewbha katkum ka jinglait por ym ha ka sngi plie, wat pynbakla ïa ka jingshisha: BJP

Shillong, K’lyngkot, 21: “Ka jingkhot sngewbha ban leit jngoh ïa ka Ram Temple ka long katkum ka jinglait por bad ym na ka bynta ka jingplie paidbah; wat pynbakla ïa ka jingshisha,” la ong ka BJP ha u kyrwoh ba la phah da u Convenor ka State Media Cell ka BJP Meghalaya Pradesh u Sabyasachi Ghose.
“Ka khubor ba mih dang shen ha kawei na ki kot khubor phareng jong ka jylla imat ka ai jingmut ïa ki katto katne ki nongïalam seng saiñpyrthei bad nongïalam Niam jong ka Jylla, ban ‘ym leit’ sha ka jingkhot sngewbha ba la khot da ka State BJP (ym da u Myntri Rangbahduh kumba la thoh bakla),” ong u kyrwoh.
‘Ka State BJP ka pynpaw shai ba ka jingkhot sngewbha na ka bynta ka jingleit jngoh ïa ka Shree Ram Temple ba dang shu dep shna thymmai, katkum ka jinglait por jong ki nongshah khot sngewbha, hynrei ym na ka bynta ka jingplie paidbah namarba ha ka shithi khot sngewbha ym shym la thoh satia ïa ka tarik. Ka long kaba donkam ban tip ba ki nongshah khot sngewbha ki ladep pynpaw ba ki kloi ban pdiang da ka jingkylluid mynsiem. Nalor kata, ïa ka prokram plie la ai jingkyrkhu lypa da ki nongshong shnong bapawkhmat ka jylla,” la bynrap u kyrwoh.
Hangne, kaba donkam ban tip, ka long ba la bthah ïa baroh ki Myntri Rangbah ka BJP, ki Myntri ka Sorkar Pdeng, ki Myntri jong ki Sorkar Jylla bad baroh ki nongïalam jong ka party bad ïa ki nongtrei ba kin sakhi ïa kane ka sngi kaba khraw da kaba peit ïa ka Live ka ban sa pyni na ka jaka lehniam, na ki jaka ba ki don ha ka 22 tarik, Kyllalyngkot, 2024, la pyntip u nongpathai khubor ka BJP. Manla uwei pa kin leit jngoh ïa ka Shree Ram Temple ha ka sngi kaba ki mon, kane kan long ruh kumjuh na ka bynta ka jylla Meghalaya.
“Ka BJP Meghalaya ka pynpaw ba ka jingpynmih khubor bymdei ha kawei na ki lad pathai khubor ka long tang ka jingpyrshang ban pynpulom ïa ka sngi bakhraw bad ban ïalam bakla ïa ka jingshisha. Ka Shree Ram Temple ba la tei thymmai ha Ayodhya ka don ïa ki khanatang barim bad ka dei ruh ka jaka ba kyrpang na ka bynta kiba bun ki nongshong shnong ha ka ri India. Kum kine ki jingthoh ki dei tang ki jingpyrshang ban tah rong ïa ka dur jong ka Meghalaya ba kam mynjur ïa ka jingsngew jong ki katto katne ki nongshong shnong bad ka ïakhlad na ka dewbah jong ka ri. Kane ka long kaei kaei kaba sngewsih ban pyrkhat na ka bynta ki briew kiba don ha la ki jong ki jingngeit bad ki lariti bapher bapher kiba ju im ha ka jylla hapdeng ka jingsuk bad im hapdeng ka jingïakmen lang. Ka BJP Meghalaya ka kyrpad ba dei ban sangeh noh shisyndon ïa ki khubor kiba noh shiliang,” ong shuh shuh u kyrwoh na ka BJP.