Shillong, K’Lyngkot 21: Da kaba snohkti lang bad ka Ek Bharat Shreshtha Bharat jong ka sorkar pdeng kaba don ïa ka thong ban wanrah ïa ka jingïadei bad ka jingïajan kaba kham khlain bad ruh ban kyntiew ïa ka jingïajan ha ki jylla jong ka Ri bad kumjuh ki Union Territories, ka Raj Bhavan Shillong ha ka sngi Saitjain ka la pynlong ïa ka jingkynduh lang ban rakhe burom ïa ka jingïoh jylla pura ka Meghalaya, Tripura bad ka Manipur.
Ha kane ka sngi, u Lat ka jylla, u Phagu Chauhan u la long u Kongsan ha ryngkat ka jingdonlang u Additional Chief Secretary, u Dr. Shakil P Ahammed, IAS bad ruh u Commissioner & Secretary jong u lat, u Dr. BDR Tiwari, IAS.
Katei ka jingkynduh lang ka sdang da ka jingkynmaw burom ïa ki riewshlur ka jylla naduh u Tirot Sing, u Kiang Nangbah bad ruh u Pa Togan Sangma kiba la aiti ïa ka jingim na ka bynta ka Ri bad ka Jaidbynriew.
Ha ka jingkren pdiang, u Dr. BDR Tiwai u la kren sngewtynnad bha ban kynmaw bad phaidien kumno la ïoh ïa kine ki jylla.
La pynphuh ïa kane ka jingkynduh lang da ka jingwai bad ki jingpyni ïa ki kolshor jong kitei ki lai tylli ki jylla.
Ïa kane ka prokram la pynlong da ka Raj Bhavan Shillong da ka jingïatrei lang bad ka tnad Arts & Culture ka sorkar jylla ryngkat kat Indian Council for Cultural Relations (ICCR) Shillong.
