Jowai: Ka seng JSU ka pynpaw ïa ka jingbym sngew ïahap halor ka jingpyllait ka sorkar ïa ka jingrwai Anthem kaba dang shen jong ka jylla Meghalaya bad ka seng ka la ong ruh ha ka jingshisha ka sorkar kadei ban pynrung lang ïa ka ktien jingrwai Jaiñtia pynban ka sorkar ka pynrung da ka jingrwai ha ka ktien phareng bad kane ka pynsngew sih shibun ia ki paid ka thaiñ jong ka Ri Jaintia baroh kawei. Ka sorkar ka dei ban tip ba ka jylla Meghalaya ha ka por ba ka la ïoh la ka jylla na ka jylla Assam ha u snem 1972 ha ka 21 tarik u January la shim na ar tylli ki Distrik jong ka Assam kata ka dei ka United Khasi and Jaintia Hills bad ka Garo Hills.
Kumta ka seng ka dawa na ka sorkar badei ban pynbeit thymmai ïa kane bad ki MLA na ri Jaiñtia ki shu sngap jar jar ïa kane ka sur jingrwai Anthem kaba lah pynjah ïa ka Jaiñtia na ka thup jingrwai ka jylla. Ka sorkar ka dei ban pynrung khnang baroh lai tylli ki riew lum hapoh ka jylla ba kin ïapaw lang ha kane ka anthem bad ym dei ban pynrung da ka ktien nongwei (phareng).
