Kob ïatai nia u Bah Ardent ïa ka Sorkar MDA halor ka Lokayukta Act

Shillong, K’Lyngkot 21 : U President ka Voice of the People Party (VPP) u Bah Ardent M Basaiawmoit ha ka sngi Saitjaiñ u la ther biang ïa u Symbud Myntri Rangbah ka jylla u Bah Prestone Tynsong ha kaba ïadei bad ka jingweng ka sorkar ïa ki laingut ki ophisar jong ka Lokayukta da kaba u kob ruh ba ka VPP ka kwah ba ka sorkar kan pynlong ïa ka jingïatai nia halor ka aiñ Meghalaya Lokayukta Act.
Ha ka kyrwoh sha ki lad pathai khubor u Bah Ardent u la ong ba ka jingpynksan ka sorkar lyngba u Symbud Myntri Rangbah bad ki Nongaiktien jong ka ki pyrshang beit ban ïalam bakla ïa u paidbah ka jylla ha kaba ïadei bad kane.
“Ngi ïohi ïa ka jingbatai pynksan jubor jong ka sorkar MDA lyngba ki nongïalam jong ka bad kum ka party ngi kwah ban kren shai ba ka party ka kwah ba ka sorkar kan pynlong ïa ka jingïatai nia ba ngin ïatai bin pa bin ïa ka aiñ bad ki rule jong ka Lokayukta khnang ba u paidbah ka jylla un shai mano ba de,” u la ong.
U la ong ruh ba lada peit na ka jingkren jong ka sorkar lyngba ki nongïalam jong ka ki kynnoh beit ba ka jingthung ïa ki laingut ki ophisar tohkit ka dei kaba be-aiñ khnang ba ka jingtohkit jong ki kan ym ksan shuh bad ba ka jinglap ka jingtohkit jong ka party pyrshah ïa u MLA ka NPP bad kiwei pat ki MDC bad ki ophisar ha ka jingpyntrei ïa ka skhim jong ka GHADC kan ïap noh.
“Ka jingong jong ki ba ka jingthung ïa kito ki ophisar tohkit ka dei kaba be-aiñ ka long khnang ba ka jingtohkit jong ki ruh kan ym ksan shuh ha khmat ka aiñ,” u la ong.
“Nga ïohi ïa ka jingkren u Symbud Myntri Rangbah kaba long ka jingkren khynnah khunlung da kaba ua ong ba ka jingshim khia ka VPP ban ïakhun ban thungkam biang ba ïoh lehse ki dei kiba ha ïing jong ngi hynrei nga kwah ban kren shai ba lada dei kiba ha ïing u Symbud Myntri Rangbah ka jylla kum ka party haba don kano kano ka jingshah ïuhroit ka hok jong ki ngin mih beit sha khmat,” u la bynrap.
Shuh shuh ha kaba ïadei bad ka jingkam u Bah Prestone ba ka jingweng ka sorkar ïa kito ki ophisar tohkit namar ba ki la shongthait na ka kam ban thung pat da kiba dang trei ha ka kam sorkar kin kham don ka jingkit khlieh ka dei ka dak ka shin ïa ka jingshyrkhei ka bamsap ba ka kwah ban tohkit da ki ophisar kiba dang trei kiba ka dang ïoh ban khyrwait shabi katba mon.
“Lada thung da kiba la shongthait ka sorkar kan ym don bor shuh ban tuklar ïa ka kam jong ki hynrei lada kiba dang trei ïa ka kam kan lah ban hukum katba ka mon na kata ka daw ka ka kwah ban thung da kiba dang trei bad nga sngew dei ban ong ba ha ka act dei ban kham shai bad ban ai beit ba ki ophisar tohkit kin dei kiba la shongthait na ka kam ba kin ïoh ban trei laitluid,” u la ong.
Shuh shuh u la ong ba ka party ha kine ki sngi kiban wan kan leit ban wad jingtip na ka sorkar ha kaba ïadei bad ka jingpynkhreh na bynta ban pynbiang ïa ka jaka thoh eksamin Common University Entrance Test (CUET) namar lada ïaid shakhmat ban pyntreikam ïa kane ka eksamin na bynta ban ïoh pule ha ki kyrdan Undergraduate Course kan ktah shibun ïa ki samla pule kaban wanlam pat ïa ka jingpep skul shiteng por.