Shillong, Naiwieng 09: Ka Kynhun Myntri ha ka sngi Balang ka la rai ban ai ban siew baibam tymmen ïa ki 3,635 ngut ki nongtrei ad-hoc kiba trei ha ki kam ba la dei ki sanctioned post ha ki tnat sorkar bapher bapher hadien ba ka sorkar jylla ka la sorkar ka la ithuh ïa ki kum ki nongtrei ba pura jong ka.
Haba pyntip halor kane u Myntri Rangbah ka jylla u Conrad K Sangma u la ong ba da kaba pynshong nongrim na ka rai bishar ka Supreme Court, ka sorkar jylla ka la rai ban shim ïa ka rai ba kyrpang ba ki nongtrei ad-hoc kiba trei ïa ki kam ba dei jong ki sanctioned post yn thungkam pura noh ïa ki.
U la ïathuh ruh ba ka sorkar kan siew ïa ka baibam tymmen jong kine ki nongtrei bad lada dei ba ki la khlad noh ruh kiba ha ïing jong ki kin ïoh ïa kane ka bhah jong ki.
“Ngi la shim ïa kane ka rai kyrpang tang na bynta ki 3,635 ngut ki nongtrei bad kane kam kynthup ïa kiwei pat ki nongtrei ad-hoc lait na kitei kiba la kdew”, u la bynrap.
