Mynta u bnai yn shnong jingïalang ki ar Myntri Rangbah na bynta ka jingpynbeit pud

Shillong, Naiwieng 09: U Myntri Rangbah ka jylla u Conrad Sangma ha ka sngi Balang u la ïathuh ba ka jingïakren na bynta ka jingpynbeit pud ha ka wat kaba ar hapdeng ka jylla Meghalaya bad Assam yn sa ïa shong mynta hi u bnai.
Haba kren sha ki lad pathai khubor, u Myntri Rangbah u la ong, “Kumba long mynta shibun bah ki kam ki kam ki la ïaid shakmat bad na ka liang jong ki commitee ruh ki la leh shibun bha ki home work jong ki bad ki jingïakren ruh ki la ïaid wat la ym pat dei ka jingïakren ba long official ruh bad nga kyrmen ba la kumno kumno ka jingïakren ba nyngkong ngin ïoh shong noh mynta hi u bnai.”
U la bynrap, “Nga kyrmen ruh ba ka jingïakynduh ki Regional Committee kan long noh mynta hi u bnai khnang ban ïoh sdang noh ïa ka jingïakren pynbeit pud sa ka wat ba ar.”
U la ïathuh ruh ba dang ha kine ki khyndiat sngi ba la dep u la ïoh ban ïakren bad u Myntri Rangbah ka Assam u Himanta Biswa Sharma bad ong ruh ba tang shu kut ka North East Olympics Games na ka liang ki arngut ki Myntri Rangbah kin ïoh ban shong jingïalang biang.