Lyngba ka 15th Finance Commission ïoh ka Council haduh T.13.65 klur

Tang shisngi kut noh ka Dorbar Tlang ka JHADC

0

Jowai, Naiwieng 09 : Ka Dorbar Tlang jong ka Jaiñtia Hills Autonomous District Council (JHADC) kaba la long mynta ka sngi 9 tarik u Naiwieng kala long kaba ïaid beit ïaid ryntih la sdang ia ka Dorbar naduh ka por 10:30 mynstep bad kala poi ruh sha kaba kut ha kane hi kajuh ka sngi bad kata ruh tang hapoh 2 (ar)kynta, hapoh ka jingpynïaid u shongknor ka JHADC, u Dr. Sanki Shangpung MDC.
Haba sdang jong ka Dorbar la don ka kynta kylli jingkylli na ki 2 ngut ki MDC jong ka liang pyrshah, ha kaba u ma A.A Shullai uba la kylli na ka Executive Committee ba ka JHADC ha ryngkat ki Dolloi kiba dep buh ne em ïa ki jaka lum khajna hapoh ki Elaka bad la ïoh jubab na u EM ma F. Bareh kaba long haoid.
Ula pan jingtip la ka don ne em ka jingpyntrei ïa ka Iawmusiang Complex naduh ka 1 tarik u March 2022 hahuh 31 October, 2022 ka jubab ka long em, da kaba pynshai ba kane ka kam ka dang don ha ka jingïalehmukot duma da u Contractor. Shuh shuh ula pan jubah ïa ka bhah pisa ba la pyllait sha ka Council lyngba ka 15th Finance Commission na ka bynta ka 1st April 2022 haduh 31st October 2022, na ka liang u EM ma P. Dkhar ula ïathuh ba la ïoh haduh T.13,65,00,000/- tyngka.
Sa kawei ka jubah kaba la pynsamrkhie lang ïa ki MDC ka long halor ka jingkylli ba u ma A.A Shullai ula kylli shaei ba ka District Council ka leit bret ïa ki ñiut kiba mih na ka ïew kaba don ha Lad Stadium Iawmusiang, hynrei la jubab na u EM ma E. Teron ba ka jingkylli kam long kaba shai.
Katba u ma L. Biam MDC ka BJP ula pan jingtip katno ka dor jong ka bai khajna ïa ki bar jylla kiba ñiah kali khlem ki Trading Lilence ba biang hapoh ka Rilum Jaiñtia kaba kin hap ban siew ha Mookyndur bad Ratacherra Check Gate, ka jubah ka long tang 200 tyngka kawei, utei u MDC ula kyntu ïa ka EC ba ladei ban pynkiew sha ka 1000/- tyngka khnang ban kan kiew ka bai khajna jong ka Council.
Ula pan jingtip ruh halor ka jingïohlum ïa ka Royalty kaba kynthup naduh ki Major bad Minor Minerals na ka sorkar jylla naduh ka 1.4.2022 haduh 30.9.2022, ka jubab ka long na ki Major Mineral ka long T. 53,18,11,649/- katba na ki Minor bad na ki kali ym don.
U ma Biam ula pan jingtip haduh katno tylli la dep ban issue NOCs da ka EC sha ki Coke Factory hapoh ka Jaiñtia Hills naduh ka 1.3.2019 haduh 30.9.2022, ka jubah na CEM ka long 42 tylli. Ha kaba ïadei bad ka jingïoh bad jingpyllut ïa ka Revenue jong ka Council na ki mar poh khyndew naduh ka 1.4.2022 haduh ka 30.9.2022 la ïoh jubah ka jingioh ka long T.59,61,04,063 bad ka jingpynlut T.59,18,96,113/-. Ha kane ka Dorbar Tlang la kynmaw burom ïa u (L) S. Pohrmen uwei na ki MDC ka War Central uba la khlad na kane ka pyrthei, na ka liang ki para MDC kila ai ruh ïa ki kyntien sngewlem sha kiba haïing ha sem jong u ha ka juh ka por la pynlong ka jingsngap jar ba shipor.
U Chief Executive Member ma T. Shiwat ha kane ka sngi ula wanrah ruh ïa ka House Committee bad ki Dkhot jong ka ki kynthup ïa Chairman Dr. Sankey Shangpung MDC, Vice Chairman ma Het Pohthmi MDC, ki member ma Awhai Andrew Shullai MDC, ma Lakhon Biam MDC, ma Saron Paswet MDC, ma Aiborlang Shadap MDC.
Naka liang ka Dorbar kala monjur ruh ïa ki 6 ngut ki ophisar ki ban kiew kyrdan katkum ka Rule 29 (1) & (2) (F) of the Assam and Meghalaya Autonomous District (Constitution jong ka District Council) Rule, 1951. U CEM ula wanrah ruh ïa ka report treikam ka Comptroller & Auditor General of India na ka bynta u snem 2011-12 bad 2012-13.
Na ka liang ki MDC kila ai jingmut ban pynbha shuh shuh ïa kane ka report ha kaba ïadei bad ki rukom buh jingkheiñ ïa ki jingpynlut pynsep da kaba ai jingmut ruh ban phah training ia ki nongtrei kumba ïaid ka por, khnang ba ka rukom buh jingkheiñ jingdiah kan long kaba ryntih bad ha ka juh ka por kan ai jingshaniah ïa ka sorkar pdeng ban pynlait khambun ka bhah pisa sha ka Council.

Leave A Reply

Your email address will not be published.