Pynkup burom ka JNC-CB ïa ki khynnah kiba pass bha ha ka SSLC

0

Khliehriat Naiwieng 9 : Ka Jaiñtia National Council Central Body, mynta ka sngi ka la pynkup burom ïa ki khynnah kiba la pass bha shakhmat ha ka exam SSLC, ïa kane ka prokram la pynlong ha Khliehriat West Community Hall, ha kaba u Principal jong ka Jaiñtia Eastern College, u Dr Phervision Nongtdu, u la wan ban long kum u kongsan bad u MLA ba rim jong ka Khliehriat, u bah Justine Dkhar u la long kum u Symbud Kongsan ha kane ka sngi.
Haba kren ha ka jingïalang, u Dr Phervision Nongtdu, u la ai ki kyntien pynshlur bad ai mynsiem ïa ki khynnah pule ba ki dei ban don ka jingmut kaba skhem ban kiew shaphrang ha ki jingpule, ym tang katta, u la pynshlur ruh ba kim dei ban buhrieh ïa ki sap ki phong ba ki don bad ba ki dei ban pynpaw pyrthei ïa ki sap ba kin long ruh kum ki lad ban kamai, haba kren halor kane ka phang u Dr Nongtdu, u la pynpaw ba ka Education Policy ba thymmai ka dei ka Policy kaba don jingmut bad kaba bha ka ban kyntiew ïa ki khynnah ha kiba bun ki liang “Ai ba ka pyrthei kan tip bad kan iohi ïa ki sap ki phong” ha kajuh ka por u la ong ruh ba lada ki khynnah ki kwah shisha ban poi sha ka thong ki dei ban long kiba trei shitom, kiba skhem jingmut bad kiba don ka jingkut jingmut kaba skhem bad kum u rangbah uba ïohi jngai, u la pashat jingtip ba ki khynnah pule ki dei ban don ka jingmut ne jingthmu ban tei ïa ka lawei dei naduh ka kyrdan pule kaba khatwei (Class XII), namar dei na kane ka kyrdan ba ki khynnah ki lah ban shim ïa ka rai ban sdang ïa ka jingïaleh ban saiñdur ïa ka lawei ha ka jingim jong ki.
U Symbud Kongsan, u bah Justine Dkhar, u la buh shibun ki kyntien shongsbai ki ban lam lynti ïa ki khynnah pule sha ka lawei kaba phyrnai bad ban long ka jingim kaba jop, ha kaba u la kyntu ba ki dei ban long kiba don ka akor ka burom, kiba kongnguh, kiba sngewrit, ban long kiba shah shkor bad sngap ïa ki jinghikai jong ki nonghikai ha skul, ym dei ban long kiba khapnap “Ka jingtip kam ju lut, kumta dei ban ïa ai kylliang ïa ka jingstad kaba phi tip, ym ju dei ban long kiba sarong, kumjuh ruh ym ju dei ban long kiba lehrain ban kylli ïa kaei kaei kaba phim tip” u la kyntu ïa ki khynnah.
U President jong ka Jaiñtia National Council,u bah Wanshwa Suting, u la kyntu ïa ki khynnah ba ki dei ban long ki khynnah kiba don burom bad ban burom ïa ki nonghikai,namar ki nonghikai ki dei kiba saiñdur ïa ka longbriew man briew jong ki khynnah, kum u nongïalam sengbhalang, u la pynpaw ka jingsngew khia halor ka jingleh beiñ ka sorkar ïa ki nonghikai, ha kaba ha ka jingshisha ki nonghikai ki la aiti shisha met bad mynsiem ban ai ïa ka jingnang jingstad ha ki khynnah namar ka jingnag jingstad ka dei ka bor ne ka iktiar.
Ka kong Lida mary Sutnga, ka wei na ki nonghikai skul ka la ai khublei kitbok kitrwiang yia ka Jaiñtia National Council kaba la pynlong ïa kane ka prokram ba kyrpang ka ba pynshlur bad ai mynsiem ïa ki khynnah, ka la ai ruh ïa ki kyntien sneng kyntu ïa ki khynnah ban pynskhem ïa ki jingmut jingpyrkhat jong ki ban pynleit jingmut tang ha ki jingpule.
Kiba la ai jingkren ki kynthup ruh u Secretary JNC Central Body, u samla Symboh.B.Sumer bad u President JNC Khliehriat Circle, u samla Remiki Dkhar, ïa ka prokram la pynïaid da u bah Leoshwa Siangshai.
Ki khynnah kiba la ïoh khur ïa kane ka khusnam, ki dei kiba na ka skul Little Flower Secondary School, Little Star Acadamy School, Khliehriat Secondary School, Khliehriat Presbyterian Higher Secondary School bad na Ambrose Memorial Secondary School, kiba kynthup Phisadalin Lyngdoh, ka Ibalari Tlang, u Rishot Mukhim,Risakhiat Sukhlain,Rioo Langstang, Wandaphi Pala, Damepaia Pala, Bisharlang Salahe, Mentre Dkhar, Venessa Rymbai, Katrina Swer, Mary Vianey Bareh, Valencia Dkhar, Dashisha Langstang, Eriton Gashnga, Ferdinand Lamare, Destiny Shadap bad Edison Nampui.
Ïa kitei ki khynnah kiba la pass bha ha ka exam SSLC ka Jaiñtia National Council ka la pynkup burom da ka khung pisa, ki syrnot bad momento ha kaba u kongsan, u symbud kongsan ki la sam ïa ki khusnam.

Leave A Reply

Your email address will not be published.