Pynkup burom ka ophis u DC EJHD ïa ka samla Irene Dkhar ba ïoh ïa ka nam Miss North East

Khliehriat Naiwieng 9: Ka ophis jong u Deputy Commissioner ka East Jaiñtia Hills District, mynta ka sngi ka la pdiang burom ïa ka samla Irene Dkhar, 20 snem kyrta, kaba na ka shnong Rymbai, East Jaiñtia Hills District, kaba la ïoh rah ïa ka nam lah duh kum ka ‘Miss North East’ ha ka jingiakop ba la pynlong myn ha ka 4 tarik mynta u bnai ha ka nongbah Kohima ha Nagaland.
U Deputy Commissioner, EJHD, u Abhilash Banarwal,IAS, u la aiti ïa ka Momento sha ka samla Irene Dkhar bad kiba la ïa don ryngkat lang ha kane ka prokram, ki kynthup ruh, u Additional Deputy Commissioner, u bah Jonathan Shylla, u District Coordinator jong ka Swachh Bharat Mission EJHD, u bah Wanbha Buam, ka kong ïaipynkhreh Dkhar, u bah Jensing Bareh kiba dei ka kmie bad u kpa jong ka smala Irene Dkhar, kiba ha ïing ha sem, ki nongtrei jong ka ophis u Deputy Commissioner bad kiwei kiwei.
Ha ka prokram ba la pynlong ha Conference Hall ha DC Ohis ha Khliehriat, na ka liang u Deputy Commissioner ka East Jaiñtia Hills District, u Abhilash Banarwal, IAS, u la pdiang burom bad ai ka jingkhublei kitbok kitrwiang ïa ka samla Irene Dkhar ba kan nang kiew irat shaphrang bad u la pynpaw ka jingsngew kmen halor ka jingjop jong ka kaba la wanrah ïa ka nam bad ka burom ym tang ïa ka district, hynrei ia ka jylla hi baroh kawei, ha kajuh ka por u la kyrpad ïa ka samla Irene Dkhar ba kan shim ïa ka bynta ban long kum ka nongai mynsiem ïa kiwei kiwei ki para samla ruh ban mih shakhmat ha kino kino ki rynsan ba kiwei pat ki para samla kin peit sha ka kum ka nongmuna ban kyntiew ïa ka thaiñ bad ïa ka jylla hi baroh kawei.
Haba kren sha ki pathai khubor, ka samla Irene Dkhar, ka la pynpaw ïa ka jingthrang jong ka ban ai ka jingshakri ïa ka imlang ka sahlang ha kaba iadei bad kito ki briew kiba don jingduna ha ka bor pyrkhat ban tei katba lah ïa ka jingmut jingpyrkhat jong ki ha ka pyrkhat pyrdaiñ bad ong ruh ba kane ka dei ka por kaba biang ban ai ka jingshakri ban wanrah ruh ïa ka shongsuk, shongsaiñ, ha ka jylla bad ha ka ri hi baroh kawei, ka la pynpaw ba ka don ka jingthrang ban long kum ka Phychologist.
Ha kajuh ka por, ka samla Irene Dkhar ka la ai ka jingkhublei ïa u Deputy Commissioner uba la khot ïa ka sha kane ka jingpdiang burom kaba long kum ka jingai mynsiem shuh shuh ïa ka ban ïaid shakhmat.Ka la ai ruh ka jingkhublei ïa ki paidbah jong ka East Jaiñtia Hills District bad ïa ki paidbah jong ka jylla hi baroh kawei kiba la kyrshan ïa ka naduh ka sngi ba nyngkong eh.
Ka la iatyhuh ba ha ka por ba ka ïoh ban phong ïa ka paiñsngiat kum ka nongjop ha ka rynsan Miss North East, ka mynsiem jong ka ka dap da ka jingkmen bad ai nguh ïa u Blei, kumjuh ruh ïa ki kmie ki kpa kiba kyrshan ïa ka barabor, ka la ong ruh ba ka long kaba donkam ban long kiba trei shitom.