Nongpoh, Naiwieng 09 : Ki heh nongïalam jong ka party UDP ha Ri-Bhoi District naduh u Bah Donbok Khymdeit President, Bah Michael Kharhunai Secretary ryngkat ki nongkitkam naki Circle bapher bapher mynta ka sngi kila lum syndon da ka jingïalang ba kyrkieh ban ïakren ïathir halor ka jingmih noh katto katne ki nongïalam jong ka party ba kynthup naduh u Vice President ka party u Bah Donkupar Sumer kiba la kynnoh ruh ba ka jingmih noh jong ki naka party ka dei namar ka jinglehbeiñ bad ka jingbym kheiñ snep satia ïaki, hadien baka party UDP kala pynduh tiket noh ïa u Bah Donkupar Sumer ban ïakhun na Umsning Constituency kumba la mih haki lad pathai khubor ha kine ki sngi bala leit.
Haba kren sha ki lad pathai khubor mynta ka sngi naka liang u Bah Donbok Khymdeit kum u President u la pynshai ba ka jingkynnoh u Bah Donkupar Sumer ba ka party UDP ka lehbeiñ bad kam shym la kheiñ kor ne kheiñ snep bad leh shilliang ka dei tang ki jingkynnoh ba khlem nongrim bad ka jingthmu ban pynpait pynpra ïaka party, hynrei ka dei hi ka daw shimet jong u ba u la kwah mih noh naka party bad kum ka party hi kam don kano kano ka jingsngew hynrei kila kloi ban pdiang ïaka rai jong ki bad ban weng noh naka jinglong dkhot haka party bad kum ka party kam don daw pyrshah eiei ïaki.
Naka liang u Bah Donbok Khymdeit u la pynpaw ba ha u 2013 naka liang u Bah Donkupar Sumer u la pan tiket ban ïakhun elekshon MLA haka por ba u bat kum u President ka KSU North Khasi Hills District, hynrei hadien ba ka party kam shym la lah ban leh katkum ka jingkwah jong u, kala don ka jingkhylliap lama ïaka party UDP ha Umsning ban pynbna ruh ba ka party UDP kam don shuh ha Umsning.
Hynrei ha u 2014 u Bah Donkupar Sumer u la pan tiket biang ban ïakhun MDC, bad ka party kala pdiang bad u la jop kum u MDC bad ha u 2018 u Bah Donkupar u la pan tiket biang ban ïakhun MLA hynrei um shym lapoi shaka thong bad kumjuh ruh ha u 2019 ka party UDP kam shym la kyntait ne lehbeiñ ban ai ïaka tiket MDC bad um shym lah ban poi shaka thong, hynrei ban shu kynnoh ba ka party UDP kam shym la kheiñ snep bad lehbeiñ ka long ka bym don nongrim namar ka tiket kam shong ha ki heh nongïalam hynrei ka dei hi ka sur jong ki paidbah ba bun ba lang, namarkata kum ka party kam don kano kano ka jingleh lyndet.
