Rai ïatrei lang ka UDP bad HSPDP ban sei da u kyrtong mon lang ha ka election Lok Sabha

Shillong Risaw 30: Ka United Democratic Party (UDP) bad ka Hills State People’s Democratic Party (HSPDP) ki la rai ban ïatreilang kum ka kynhun synrop Regional Democratic Alliance (RDA) ban pynïeng ïa u kyrtong ba ïamonlang na ka bynta ka elekshon MP Lok Sabha 2024.
Tangba kine ki party kim pat rai satia ïa ka kyrteng jong u Kyrtong ïamonlang ne Common Candidate. Hooid 3 tylli ki kyrteng kiba la paw bha ba ki kwah ban ïakhun ïa ka elekshon na ka kynhun ki kynthup ïa u President ka Khasi Author Society (KAS) Dr DRL Nonglait, u Nongïalam barim ka HYC Bah Robertjune Kharjahrin bad MLA barim ka UDP Bah Process T Sawkmie.
U nongialam ka UDP u Dr. Jemino Mawthoh, haba ïakren bad ki nongthoh khubor hynne ka sngi, ula kyntu ïa kiwei pat ki seng riewlum ba kin ïawan ban ïa snohkti lang ha ka ban lah pynmih tang ïa kawei ka sur jong ka Jaidbynriew.
“Lada ki don kiwei pat ki seng riewlum kiba kwah ban ïasnohkti lang bad ngi, ngi long kiba kloi ban ïatreilang bad ki da ka jingïatylli. Ngi thrang ban ïohi ban don ïa ka jingïatylli jong ka jaidbynriew bad ka jingïatylli jong baroh ki seng riewlum” ong u Bah Mawthoh.
Ula banjur ba ka UDP bad ka HSPDP, ki dei ki artylli ki seng riewlum kiba la rim tam bad ki dei ruh ki seng kiba don ïa ka jingïatreilang kaba la slem bha bad kin ïatreilang kum ka kynhun ki seng riewlum na ka bynta ka bha ka miat jong ki paidbah.
Haba kylli la ki la ïakren bad ka seng Voice of the People’s Party (VPP) ha kaba ïadei bad u kyrtong ïamonlang, u Bah Mawthoh ula pynshai ba ka seng kam pat ïakren eiei bad ka VPP haduh mynta.
“Lada jia ba ngi hap ban ïakren bad ki (VPP), Nga tharai kam dei ka jingthmu kaba sniew.Ngi dei ki seng riewlum kiba don ïa ki juh hi ki nongrim, ka jingïohi jngai, ki jingsngewkhia kiba kumjuh bad ki mat ruh kiba kumjuh. Nga shimet hi nga sngew ba ngi dei ban long kiba ïatylli lang” ong u Bah Mawthoh.
U Bah Jemino Mawthoh, ha ka elekshon MP Lok Sabha 2019 kaba la dep ula long u Kyrtong ïamonlang jong ka kynhun Meghalaya Democratic Alliance (MDA) bad ula ïakhun na ka shap jong ka seng UDP bad ula ïoh ïa ka jingkyrshan na baroh ki seng riewlum kynthup na ka seng National Peoples Party (NPP) kaba ïalam ïa ka sorkar jylla, hynrei mynta ka kynti kin ym ïatreilang bad ka NPP ha ka elekshon MP Lok Sabha bad ki la kyntu ïa baroh ki seng riewlum ban ïatylli lang kawei ban thaw ïa ka kynhun kaba khlaiñ jong ki seng riewlum.
Ha kawei pat ka liang naka liang jong ka seng VPP kala dep ban pynbna ban pynïeng da u Dr. Ricky Syngkon ïa ka elekshon MP Lok Sabha.